जळगाव जिल्हाधिकारीपदी रोहन घुगे यांची बढती
सकाळ वृत्तसेवा
ठाणे, ता. ७ : ठाणे जिल्ह्यातील ग्रामीण भागातील शिक्षण विभागाला दिशा देत, जिल्हा परिषदेच्या शाळांमधील गुणवत्ता वाढविणे, शाळांचे डिजिटलायझेशन करणे, मुख्यमंत्री १०० दिवस कृती कार्यक्रमाअंतर्गत नावीन्यपूर्ण उपक्रमांसह प्रशासकीय कामातील आमूलाग्र बदल आदी उपक्रमांमुळे झेडपीने प्रथम क्रमांक पटकावला होता. त्यांनी केलेल्या या कार्याची दखल घेत, त्यांची जळगाव जिल्हाधिकारीपदी बढती देण्यात आली असल्याचे बोलले जात आहे.
ठाणे जिल्हा परिषदेचे मुख्य कार्यकारी अधिकारीपदी रोहन घुगे १९ जून २०२४ मध्ये रुजू झाले होते. त्यानंतर त्यांनी ठाणे जिल्हा परिषदेतील प्रशासकीय कामकाजात पारदर्शकता व गतिमान काम करण्यावर भर देण्यात आला. तसेच शिक्षण क्षेत्रात आमूलाग्र बदल करत, डिजिटलायझेशण करणे, जिल्हा परिषदेच्या शाळांमधील गुणवत्ता सुधारणे, विद्यार्थ्यांची शैक्षणिक गुणवत्ता वाढविण्यासाठी दिशा प्रकल्प हाती घेतला. ग्रामीण भागातील आरोग्यसेवेला बळकट करण्याचे काम केले. तसेच स्वातंत्र्यापासून जिल्ह्यातील शहापूर तालुक्यातील दापूरमाळ या आदिवासीवाडीवरील आदिवासींच्या समस्या जाणून घेण्यासाठी वाडीवर दाखल झाले. तेथील रस्ते, शाळा यासह घरकुलांचे प्रश्न मार्गी लावले. तसेच रस्त्याच्या कामाचा नारळदेखील स्वातंत्र्यदिनी वाढवत प्रत्यक्ष कामाला सुरुवात केली. त्यांनी जिल्ह्यातील ग्रामीण भागातील सर्वांगीण विकासासाठी केलेल्या कामांच्या पोचपावती म्हणून रोहन घुगे यांना जळगाव जिल्हाधिकारीपदी बढती मिळाली असल्याचे दिसून येत आहे.