रिक्षाचालकांचा कोकण भवन येथे मोर्चा
नेरूळ, ता. १५ (बातमीदार) ः नवी मुंबई आणि पनवेल येथील रिक्षाचालकांनी त्यांच्या न्याय्य हक्काच्या मागण्यांसाठी सीबीडी बेलापूर येथील कोकण भवन कार्यालयावर धडक मोर्चा काढला होता. राज्य सरकारने बाइक टॅक्सीला दिलेली परवानगी तत्काळ मागे घ्यावी, मुक्त रिक्षा परवाने वाटप बंद करावे, सीएनजी बाटला टेस्टिंग दर कमी करावे, आरटीओतर्फे ऑनलाइन लावण्यात येणारे दंड अभय योजना अंतर्गत माफ करावा, सरकारने सर्व रिक्षाचालकांचे रिक्षाचे कर्ज माफ करावे, धर्मवीर आनंद दिघे साहेब रिक्षाचालक महामंडळाची सभासद फी कमी करावी, नवी मुंबई आणि पनवेल आरटीओ कार्यालयातील भ्रष्टाचार बंद करावा, आदी मागण्या या वेळी चालक-मालक संघटनाचे प्रमुख कासम मुलानी यांच्या नेतृत्वाखाली करण्यात आल्या. या मोर्चात सुनील बोर्डे, नंदू पाटील किशोर लोंढे, सुरेश काळे, संतोष जाधव, बाळकृष्ण खोपडे यांच्यासह हजारो रिक्षाचालक सहभागी झाले होते.