भिवंडी, ता. १५ (वार्ताहर) : बौद्ध धम्म हा समृद्ध इतिहास आणि मानवी जीवन जगण्याची शैली आहे. तो केवळ एका समाजापुरता मर्यादित ठेवू नका. आपला इतिहास काळाच्या ओघात दाबला आहे. आता तो पुन्हा उजेडात आणण्याची जबाबदारी आपलीच आहे, असे प्रतिपादन भारतीय बौद्ध महासभेचे राष्ट्रीय कार्याध्यक्ष, समता सैनिक दलाचे राष्ट्रीय अध्यक्ष तथा डॉ. बाबासाहेब आंबेडकर यांचे नातू डॉ. भीमराव आंबेडकर यांनी केले.
भिवंडीतील कवाड येथे रविवारी (ता. १२) भारतीय बौद्ध महासभा, भिवंडी शाखेतर्फे धम्मचक्र प्रवर्तन दिन आणि बौद्ध धम्म मेळावा झाला. या वेळी डॉ. आंबेडकर प्रमुख पाहुणे म्हणून बोलत होते. महाबोधी विहाराचा प्रश्न आपल्यासमोर असून ते केवळ धार्मिक ठिकाण नाही, आपले अस्तित्व आणि प्रेरणास्थान आहे. आगामी जनगणनेत सर्व बौद्ध बांधवांनी ‘धर्म’ या कॉलममध्ये बौद्ध अशी नोंद करावी, असे आवाहन त्यांनी केले. कार्यक्रमाला अध्यक्ष हरीश रावलिया, उपाध्यक्ष ॲड. जगदीश गवई, ॲड. केसरी मौर्या, राजेश पवार, सुप्रिया कासारे, विजय गायकवाड, शीला तायडे उपस्थित होते. कार्यक्रमाचे अध्यक्षस्थान रोहित जाधव यांनी भूषवले. सूत्रसंचालन ॲड. शशिकांत जाधव, संदीप जाधव आणि श्वेता भालेराव यांनी केले.