उरणमध्ये छाननीनंतर ६ अर्ज बाद
उरण, ता. १९ (वार्ताहर)ः उरण नगरपरिषदेसाठी शेवटच्या दिवशी ८७ अर्ज दाखल करण्यात आले होते. छाननीनंतर मान्यताप्राप्त कागदपत्रांची जोडणी केली नसल्याने २ नगराध्यक्ष आणि ४ नगरसेवक पदाचे अर्ज बाद करण्यात आले आहेत.
उरण नगरपरिषदेची निवडणूक २ डिसेंबर रोजी होत आहे. नामनिर्देशन अर्ज दाखल करण्याची शेवटची तारीख १७ नोव्हेंबर होती. शेवटच्या दिवसापर्यंत नगराध्यक्षपदासाठी ९ उमेदवारांनी अर्ज दाखल केले होते. त्यापैकी भावना घाणेकर यांचा एक तर प्रमिला पवार यांचा एक अर्ज बाद ठरवला आहे. तर नगर सेवक पदाचे चार अर्ज बाद ठरविले आहेत. त्यामुळे नगराध्यक्ष पदाचे सात अर्ज, नगरसेवक पदाचे ७४ अर्ज वैध ठरवण्यात आले आहेत.