नोटीस स्वीकारण्यास अमित ठाकरेंचा नकार
नवी मुंबई, ता. २० (वार्ताहर) : नेरूळमधील शिवस्मारक अनावरणप्रकरणी मनसे नेते अमित ठाकरेंसह ४० मनसैनिकांवर गुन्हा नोंदवला आहे. या प्रकरणात अमित ठाकरे यांनी स्वतः पोलिस ठाण्यात येऊन नोटीस स्वीकारणार असल्याचे सांगितले आहे. त्यामुळे हे प्रकरण तापण्याची शक्यता आहे.
नेरूळ येथील राजीव गांधी उड्डाणपुलाजवळ छत्रपती शिवाजी महाराजांच्या पुतळ्याचे मनसे नेते अमित ठाकरे यांनी विनापरवानगी अनावरण केले होते. या पुतळ्याच्या अनावरणावेळी मनसैनिकांनी मोर्चा काढला. तसेच पोलिसांना धक्काबुक्की करून सरकारी आदेशांचे उल्लंघन केले होते. त्यामुळे नेरूळ पोलिसांनी अमित ठाकरेसह ४० मनसैनिकांवर जमावबंदीचे उल्लंघन, बेकायदेशीर मोर्चा काढणे, पोलिसांना धक्काबुक्की करणे, सरकारी कामात अडथळा निर्माण करणे, पालिकेचे नुकसान करणे, आदी कलमानुसार गुन्हा दाखल केला आहे. या प्रकरणात चौकशीसाठी पोलिस ठाण्यात हजर राहण्यासंदर्भात बुधवारी नेरूळ पोलिसांचे अंमलदार अमित ठाकरे यांच्या बंगल्यावर गेले होते, मात्र पोलिसांची नोटीस स्वीकारण्यास नकार दिला. तसेच स्वतः पोलिस ठाण्यात हजर राहणार असल्याचे सांगितले. त्यामुळे हा मुद्दा तापण्याची शक्यता आहे.