अतिक्रमणाविरोधात पालिकेची कारवाई
जुईनगर, ता. ९ (बातमीदार) : सानपाडा रेल्वेस्थानक सिडकोने कारवाई करत रेल्वेस्थानक परिसरातील केऑक्स समोरील अतिक्रमण हटवले होते, पण त्यानंतर रेल्वेस्थानक समोरील रस्त्यावर पुन्हा बाजार थाटण्यात आला होता. या अतिक्रमणावर महापालिकेच्या पथकाने कारवाई केली आहे.
बाजार संकुल बंद असल्याने येथील सगळे व्यापारी रस्त्यावर व्यापार करत होते. त्यामुळे परिसरात नागरिकांना समस्यांचा सामना करावा लागत होता. पालिकेकडून येथील भाजीपाला आणि फळ व्यापार करणाऱ्या व्यापाऱ्यांसाठी सेक्टर ४ येथे दैनंदिन बाजार संकुल खुले करण्यात आले होते, मात्र तरी व्यापारी अनधिकृतपणे रस्त्यावर व्यापार करत असल्याने कारवाई करण्यात आली. सहा ते सात वर्षे बाजार संकुलाचा प्रश्न मार्गी लागत नव्हता. विविध अडचणींमधून बाजार संकुलाचा प्रश्न मार्गी लागला आहे, मात्र तरीदेखील रस्त्यावर व्यापार होत असल्याने कारवाई करण्यात आली.