श्रमदानातून साचले लाखो लिटर पाणी
मनोर ग्रामपंचायतीने बांधला वनराई बंधारा
मनोर, ता. १८ (बातमीदार) : ‘मुख्यमंत्री समृद्ध पंचायत राज अभियान’अंतर्गत मनोर ग्रामपंचायतीचे पदाधिकारी आणि ग्रामस्थांनी एकत्र येत बुधवारी (ता. १७) काजूपाडा येथील ओहोळावर श्रमदानातून वनराई बंधारा बांधला आहे. या उपक्रमामुळे समुद्रात वाहून जाणारे लाखो लिटर पाणी अडवण्यात यश आले असून, यामुळे परिसरातील भूजल पातळी वाढण्यास मोठी मदत होणार आहे.
सरपंच चेतन पाटील, ग्रामपंचायत अधिकारी नितीन पवार आणि गावातील ३० ते ३५ महिला-पुरुषांनी एकत्र येत ८ ते १० मीटर लांबीचा हा बंधारा बांधला. मार्च महिन्यात निर्माण होणारी पाणीटंचाई लक्षात घेऊन हा निर्णय घेण्यात आला. अडवलेल्या पाण्याचा उपयोग शेती, ग्रामस्थ आणि विशेषतः गुरांच्या पिण्याच्या पाण्यासाठी होणार आहे. जंगलातून वाहणारे पाणी साठल्यामुळे वन्यप्राणी आणि पक्ष्यांच्या पिण्याच्या पाण्याचा प्रश्नही मिटणार आहे. मनोर ग्रामपंचायत हद्दीत अशाच प्रकारचे आणखी पाच वनराई बंधारे बांधण्याचे नियोजन असल्याचे ग्रामपंचायत प्रशासनाकडून सांगण्यात आले. डोंगरदऱ्यातून निचरा होऊन वैतरणा खाडीद्वारे समुद्रात वाया जाणारे पाणी अडवण्यासाठी ग्रामस्थांनी दाखवलेली ही सक्रियता सध्या परिसरात कौतुकाचा विषय ठरत आहे.