संत, महापुरुषांवर निबंध स्पर्धा

धारावी, ता. १ (बातमीदार) : राष्ट्रीय संत रोहिदास महाराज यांच्या ६५० व्या जयंती महोत्सवनिमित्त तसेच संत कक्कया महाराज, छत्रपती शिवाजी महाराज व डॉ. बाबासाहेब आंबेडकर यांच्या संयुक्त जयंतीनिमित्त राष्ट्रीय चर्मकार संघातर्फे माध्यमिक शाळांतील इयत्ता आठवी ते दहावीच्या विद्यार्थ्यांसाठी संत व महामानव यांच्या विचारावर आधारित निबंध स्पर्धेचे आयोजन करण्यात आले आहे. विद्यार्थ्यांनी १० फेब्रुवारीपर्यंत आपले निबंध शाळेच्या मुख्याध्यापकांकडे द्यायचे आहेत.
विभागातील शाळांध्ये संघामार्फत पत्रक पोहोचविण्यात येत आहेत. संघातर्फे धारावीतील श्री गणेश विद्या मंदिर शाळा, युनिव्हर्सल रात्र शाळा, सायनमधील डी. एस. हायस्कूल, साधना विद्यालय यांना त्याचे निवेदन पत्र देण्यात आले आहेत. माटुंगा, कुर्ला, माहीम, धारावी या भागांतील शाळेला सहभागी करून घेतले जाणार आहे. कार्यक्रमाचे आयोजन संघाचे अध्यक्ष माजी आमदार बाबुराव माने यांच्या मार्गदर्शनाने व प्रदेश अध्यक्ष रामभाऊ कदम, मुंबई अध्यक्ष विलास गोरेगावकर, सचिव गणेश खिल्लारे, माजी मुख्याध्यापक पोटे आणि धारावी तालुका अध्यक्ष दिलीप गाडेकर यांच्या अधिपत्याखाली होत आहे. या कामी संपर्कप्रमुख शंकर खिल्लारे, समन्वयक शंकर बळी कार्यरत आहेत.