रानमेव्यातन घरखर्चाची बेगमी
जव्हारच्या आदिवासींना सणासुदीला आधार
जव्हार, ता.१(बातमीदार)ः निसर्गाने भरभरून उधळण केल्याने जव्हारच्या वैभवात भर पडली आहे. अशातच जंगलव्याप्त परिसरातून रानमेव्याचा हंगाम सुरू झाल्याने बाजारात काजू, हिरवी करवंदे, आंब्याच्या कैऱ्या, रानबोरांच्या विक्रीतून घरखर्चाची बेगमी होत आहे.
आदिवासी महिला पहाटेपासून जंगलातून रानमेवा गोळा करतात. दिवसभराच्या मेहनतीनंतर दुसऱ्या दिवशी स्थानिक बाजारात विक्री करतात. सध्या होळी सणाची धामधूम असल्याने रानमेव्याच्या विक्रीतून घरखर्च भागवण्यास मदत होत आहे. चैत्र-वैशाख महिन्यात रानमेवा उपलब्ध होत असल्याने जंगल परिसर सुगंधाने दरवळत आहे. रानमेव्याच्या विक्रीमुळे हंगामी रोजगार मिळत असून ग्रामीण अर्थव्यवस्थेलाही चालना मिळत आहे.
--------------------------------
शिरोशी, वनवासी सारख्या भागात प्रगत शेतकऱ्यांनी रानमेव्याचे महत्त्व ओळखून पीक पद्धती निश्चित करत उत्पादन नियोजन केले आहे. शिवाय, रानातील उपलब्ध रानमेवा खरेदीसाठी ग्राहक गर्दी करत आहेत.
- सदू अंधेर, किरमिरा
-------------------------------------
महानगरातून येणारे पर्यटक, नोकरदार, शालेय अथवा विद्यार्थी रानमेवा खरेदीसाठी येतात. यामुळे दिवसाला ५०० रुपये रोजगार मिळतो.
- अशोक चिमडा, रानमेवा विक्रेता