आंतरशालेय स्पर्धेत समता विद्या मंदिरचे सुयश
घाटकोपर, ता. २८ (बातमीदार) : बृहन्मुंबई शिक्षण विभागाच्या वतीने आयोजित एल वॉर्ड आंतरशालेय पारितोषिक वितरण समारंभ गांधी बाल मंदिर येथे शुक्रवारी (ता. २७) उत्साहात पार पडला. कार्यक्रमाला विभाग निरीक्षिका भारती भवारी तसेच एल वॉर्डमधील सर्व मुख्याध्यापक उपस्थित होते. या समारंभात समता विद्या मंदिर शाळेने उल्लेखनीय कामगिरी करीत ‘सर्वोत्कृष्ट शाळा’ द्वितीय क्रमांक पटकावला. विविध स्पर्धांमध्ये विद्यार्थ्यांनी उत्कृष्ट यश संपादन करून शाळेचे नाव उज्ज्वल केले. या यशाबद्दल समता शिक्षण संस्थेच्या अध्यक्ष पुष्करणी सुभेदार, सचिव राजेश सुभेदार, कार्याध्यक्षा ज्योती सुभेदार तसेच स्मिता सुरवसे यांनी यशस्वी विद्यार्थ्यांचे आणि मार्गदर्शक शिक्षकांचे अभिनंदन केले.