नागाच्या दंशाने तीन श्वानांचा मृत्यू
कल्याणच्या गंधारी परिसरातील घटना
कल्याण, ता. ३१ (वार्ताहर) : वाढत्या उन्हाच्या तडाख्यामुळे सरपटणारे प्राणी गारव्यासाठी मानवी वस्तीकडे वळू लागले आहेत. कल्याण पश्चिमेतील गंधारी परिसरातील एका गॅरेजमध्ये साडेपाच फूट विषारी नागाने केलेल्या दंशामुळे तीन श्वानांचा दुर्दैवी मृत्यू झाला. या घटनेमुळे परिसरात भीतीचे वातावरण पसरले होते; मात्र सर्पमित्राने नागाला सुरक्षित पकडून निसर्गाच्या सान्निध्यात सोडले आहे.

कल्याण पश्चिमेतील मुन्ना गॅरेज येथे सोमवारी दुपारी साडेतीनच्या सुमारास मालक मुन्ना यांना साडेपाच फूट नाग दिसला. नागाला पाहताच गॅरेजमधील कामगारांची मोठी पळापळ झाली. तत्काळ सर्पमित्र दत्ता बोंबे यांना पाचारण करण्यात आले. सर्पमित्र पोहोचण्यापूर्वीच, गॅरेजमधील तीन श्वान आणि नाग यांच्यात जोरदार संघर्ष झाला. यात नागाने केलेल्या विषारी दंशामुळे तिन्ही श्वानांचा जागीच मृत्यू झाला.

सर्पमित्र दत्ता बोंबे यांनी घटनास्थळी धाव घेत अत्यंत कौशल्याने त्या विषारी नागाला जेरबंद केले. त्यानंतर उपस्थितांनी सुटकेचा निःश्वास टाकला. पकडलेल्या नागाला वन विभागाच्या सूचनेनुसार नैसर्गिक अधिवासात सुरक्षितपणे सोडून जीवदान देण्यात आले. वातावरणातील वाढती उष्णता पाहता, नाग गारव्यासाठी किंवा उंदराच्या शोधात गॅरेजमधील बिळाच्या आसऱ्याला आला असावा. अशा वेळी नागरिकांनी स्वतःहून सापाला मारण्याचा प्रयत्न करू नये, असे आवाहन सर्पमित्र दत्ता बोंबे यांनी केले.