कल्याणमध्ये सहजानंद चौकात रस्त्यावर होर्डिंग कोसळल्याची घटना समोर आली आहे. या दुर्घटनेत दोन जण जखमी झाले असून अनेक गाड्यांचेही नुकसान झाले आहे. कल्याण पश्चिममधील सहजानंद चौकात शुक्रवारी सकाळी १० वाजेच्या सुमारास ही घटना घडली. ऐन रहदारीच्या या रस्त्यावर होर्डिंग कोसळल्याने वाहनचालकांना वाहतूक कोंडीचा सामना करावा लागला.

मिळालेल्या माहितीनुसार, दुर्घटना घडली त्यावेळी रस्त्यावर मोठ्या प्रमाणात वाहतूक कोंडी झाल्याचे देखील पाहायला मिळालं. कल्याण पश्चिममधील सहजानंद हा अत्यंत रहदारीचा रस्ता असून या रस्त्यावर भला मोठा होर्डिंग कोसळला. या रस्त्याच्या बाजूलाच अनेक दुकाने तसेच एक रुग्णालय देखील आहे. होर्डिंग कोसळलं तेव्हा त्याखाली पार्किंगमधील अनेक गाड्या अडकल्याने त्या वाहनांचे देखील नुकसान झाले. दरम्यान या दुर्घटनेत दोन जण किरकोळ जखमी झाले आहेत. या घटनेनंतर परिसरातील नागरिकांनी प्रशासनावर दुर्लक्ष गेल्याचा आरोप केला आहे.

घाटकोपर दुर्घटनेच्या आठवणींना उजाळा

मुंबईतील घाटकोपर येथे १३ मे रोजी झालेल्या तुफान पाऊस आणि वादळी वाऱ्यामुळे भले मोठे होर्डिंग कोसळल्याची घटना घडली होती. संपूर्ण देशाला हादरवून सोडणाऱ्या या दुर्घटनेत अनेकांना आपला जीव गमावला होता तर असंख्य जण जखमी देखील झाले होते. दरम्यान या दुर्घटनेनंतर राज्यभरात दिसून येणाऱ्या अनाधिकृत होर्डिंग्सचा मुद्दा चर्चेत आला होता. त्यावेळी मुंबईसारख्या शहरात अनाधिकृत होर्डिंग्सवर कारवाई देखील करण्यात आली. मात्र हा मुद्दा आता मागे पडला आहे . आजच्या कल्याणमधील घटनेमध्ये कोणतीही जीवितहानी झाली नाही. मात्र, पुन्हा एकदा घाटकोपर होर्डिंग दुर्घटनेच्या आठवणी ताज्या केल्या आहेत.