मुंबई - मुंबईकरांना खडड्‌यांपासून मुक्‍ती हवी असेल, तर सिमेंट रस्त्यांचा मार्ग स्वीकारावा, असा सल्ला केंद्रीय भूपृष्ठ वाहतूक मंत्री नितीन गडकरी यांनी दिला. पर्यावरण आणि विकास यात समतोल हवा, असे मत व्यक्‍त करीत ‘आरे’तील वृक्षतोड अपरिहार्य असल्याचे मत त्यांनी व्यक्‍त केले.

मुख्यमंत्री देवेंद्र फडणवीस आणि वनमंत्री सुधीर मुनगंटीवार यांनी चालवलेली वृक्ष लागवड मोहीम जगाच्या कौतुकाचा विषय झाली असताना काही वृक्ष तोडावे लागत असतील, तर त्याबदल्यात भरपाई करण्याचे धोरण शासन स्वीकारेल, असा विश्‍वासही त्यांनी व्यक्‍त केला. मोदी सरकार-२ मधील पहिल्या १०० दिवसांचा लेखाजोखा देण्यासाठी आयोजित केलेल्या पत्रपरिषदेत ते बोलत होते. 

रोजगारनिर्मिती ही आमच्या सरकारची प्राथमिकता आहे, जागतिक मंदीचे परिणाम अमेरिका चीनलाही जाणवत आहेत, ते भारतालाही थोड्याफार प्रमाणात जाणवतील, असे नमूद करतानाच त्यांनी या वातावरणातून देशाला बाहेर काढण्यासाठी पायाभूत योजनांवर; तसेच रोजगारनिर्मिती करणाऱ्या प्रत्येक बाबीवर लक्ष केंद्रित करण्याचा सरकारचा मनोदय त्यांनी स्पष्ट केला.

दरम्यान, प्रतिकूल हवामानामुळे सोमवारी केंद्रीय वाहतूकमंत्री नितीन गडकरी यांचे विमान मुंबई विमानतळावर उतरण्यास तब्बल दीड तास उशीर झाला.