मुंबई - राज्य सरकारच्या चार वर्षेपूर्तीनिमित्त महाराष्ट्र प्रदेश युवक कॉंग्रेसने अभिनव असे "निषेधासन' आंदोलन पुकारले आहे. मागील चार वर्षांत सरकारच्या कामकाजाचा लेखाजोखा घेत वेगवेगळ्या मार्मिक पद्धतीने त्यांना योगासनाचं व्यंग्य केले आहे. बुधवारी राज्यभरात युवक कॉंग्रेस हे निषेधासन आंदोलन करणार आहे.

यात भक्‍तासन, मौनासन, क्‍लिनचिटासन, महागाईआसन, गाजरासन, ट्रोलासन, वाचाळासन, राफेलासन, धमकीआसन, बेरोजगारासन, अभ्यासासन, अशा प्रकारचे व्यंग्य करत चारोळ्यामधे युवक कॉंग्रेसने सरकारच्या अपयशावर बोट ठेवण्याचा प्रयत्न केला आहे. सत्यजित तांबे यांनी युवक कॉंग्रेस अध्यक्षपदाची धुरा सांभाळल्यानंतर युवक कॉंग्रेस आक्रमक होत आहे. रस्त्यावरील आंदोलनाचा कार्यक्रम राबवत सरकारविरोधात युवक रस्त्यावर उतरतील, याची रणनीती युवक कॉंग्रेसने आखली आहे. या अगोदरही वर्धा येथील राहुल गांधी यांच्या दौऱ्यात युवक कॉंग्रेसने सरकारविरोधात तीव्र शब्दांत टीका करणारे भित्तिफलक रंगवले होते. तर, पेट्रोल दरवाढीच्या विरोधात पंतप्रधान नरेंद्र मोदी यांच्या प्रतिमेला काळे फासले होते. चार वर्षेपूर्तीनिमित्त निषेधासन असे अभिनव आंदोलन करताना या सरकारला योगाचीच भाषा कळते, अशी टीका प्रदेशाध्यक्ष सत्यजित तांबे यांनी केली आहे.