वाई बाजार ( जिल्हा नांदेड ) : माहूर तालुक्यातील पैनगंगा नदीपात्रातून वाळूचे अवैध उत्खनन राजरोसपणे सुरु असून प्रशासन व्यस्त असल्याचा फायदा घेत बेकायदेशीर वाहतूक स्थानिक तलाठी, मंडळ अधिकारी व पोलिस प्रशासनासमोर होत असल्याचे चित्र दिसून येत आहेत.

माहूर तालुक्यातील काही ठिकाणचे वाळूघाटाचे लिलाव झालेले नाहीत. तरी देखील बांधकाम करणाऱ्यांना छुप्या मार्गाने वाढीव दरात रेतीचा पुरवठा केला जात आहे. तालुक्यात वाळूचे बेकादेशीर उत्खनन करुन वाहतूक करणारे वाळूमाफिया शासनाचे उत्पन्न बुडवत असल्याचे दिसून येत आहे. माहूर तालुक्यातील पैनगंगा पात्रातून अवैधरित्या वाळूची चोरी मोठ्या प्रमाणात सुरु आहे. वाळू चोरांनी थेट नदीपात्रात ट्रॅक्टर उतरविण्यासाठी रस्ते तयार केले आहेत. 

पैनगंगा नदी पत्रातून होत असलेली अवैधरित्या वाळू चोरी ही जोमात सुरु असून रविवारी (ता. सात) रोजी माहूर तालुक्यातील पडसा शिवारात सकाळच्या सुमारास विना रॉयल्टी वाळू वाहतूक करणाऱ्या ट्रॅक्टरला सिंदखेड पोलिसांनी पकडले. सहाय्यक पोलिस निरीक्षक भालचंद्र तिडके यांच्या मार्गदशनखाली हवालदार श्री. सानप, पठाण, श्री. शेंडे, श्री. सोनसळे, श्री. पाटील यांनी ही कारवाई केली. विनापरवाना वाळू वाहतुक करणाऱ्या ट्रॅक्टरला पोलिस ठाण्यात लावण्यात आले असून तपास सहाय्यक पोलिस निरीक्षक भालचंद्र तिडके करीत आहे.

संपादन- प्रल्हाद कांबळे