नायगाव : जलजीवन मिशन योजनेंतर्गत नायगाव तालुक्यात ७६ गावात पाणी पुरवठा योजनेला मंजुरी मिळाली. मात्र केवळ तीन गावच्या पाणी पुरवठा योजनेच्या कामाला सुरुवात झाल्याने जिल्हा परिषद झारीतील शुक्राचार्य बनत असल्याचा आरोप होत आहे. विशेष म्हणजे विशिष्ट कंत्राटदारांच्या घशातच या योजना घालण्याचा खटाटोप चालू असल्याचीही चर्चा होत आहे.

नायगाव तालुक्यातील ७६ गावामध्ये जलजीवन मिशन योजनेंतर्गत पाणी पुरवठा योजना मंजूर झाल्या आहेत. या योजना मंजूर झाल्यानंतर कामे तातडीने मार्गी लागण्यासाठी जिल्हा परिषदेच्या स्तरावरुन अंदाजपत्रक तयार करणे, प्रशासकीय तांत्रिक मान्यता आणि त्यानंतर निवीदा व कार्यारंभ आदेश मिळणे आवश्यक असते. परंतु मागील अनेक महिण्यापासून पाणी पुरवठा योजना निविदा स्तरावर आल्याच नाहीत. तालुक्यातील ७६ पैकी केवळ तीन गावच्या योजनेचे काम सुरु झाले आहे.

तांत्रिक, प्रशासकीय मान्यतेनंतर निविदा प्रक्रिया राबवण्यात येते पण तालुक्यातील पिंपळगाव येथील १ कोटी ९२ लाख, शेळगाव गौरी येथील २ कोटी आणि ताकबिड येथील १ कोटी ५५ लाख खर्चाच्या तीनच योजनेचे काम सुरु आहे. तर ७३ योजना अद्यापही कागदावरच राहीलेल्या आहेत.

काही कामांना प्रशासकीय मान्यता मिळाली असून काही कामाचे अंदाजपत्रक सादर करण्यात आले असले तरी आक्टोबर २०२२ पर्यंत तालुक्यातील संपूर्ण कामाचे वर्क आर्डर मिळून जातील असे नियोजन चालू आहे.

- सुधीर सरनाईक, उप अभियंता, नायगाव.