वाई बाजार (जिल्हा नांदेड) : माहूर नगरपंचायत प्रशासनाने शहरातील सर्व वाटर फिल्टर प्लांट धारकांना भूजलसह इतर परवानग्या संदर्भात नोटीस तामील करून वाटर प्लांट सील करण्याची कारवाई केली. सोबतच माहूर शहरात वाई बाजार येथून शुद्ध व स्वच्छ पाण्याचा पुरवठा होत असल्याने वाई बाजार येथील वाटर फिल्टर प्लांट मालकांना नोटीस तामिल करून सक्षम प्राधिकरणाच्या परवानग्या संदर्भात खुलासा मागविण्यात आला आहे.

सर्वोच्च न्यायालयाच्या हरित लवादाने (ता. १९) जून २०२० रोजी पारित केलेल्या आदेशानुसार पिण्याचे पाणी शुद्ध करून विकणाऱ्या पाणी प्लांट धारकास सक्षम प्राधिकरणाची मान्यता घेणे बंधनकारक करण्यात आले आहे.परंतु माहूर तालुक्यातील ग्रामीण भागात पाण्याचे उत्तम स्त्रोत उपलब्ध असलेल्या ठिकाणी भरभराटीचा व्यवसाय म्हणून सुरू करण्यात आलेल्या पाणी फिल्टर प्लांट मालकांनी कोणत्याही सक्षम प्राधिकरणाची परवानगी न घेता मन मर्जीने साधे,थंड पाण्याचे बॅरल व पाणी पाऊच विक्रीचा धंदा सुरू केला आहे.वास्तविक पाहता त्यांना केंद्र शासनाचे भूजल सर्वेक्षण, अन्न व औषध प्रशासन विभाग व प्रदूषण नियंत्रण मंडळ इत्यादींची परवानगी घेणे आवश्यक होते. कुठल्याही ना हरकत प्रमाणपत्र ची पूर्तता केल्या शिवाय माहूर शहरासह वाई बाजार परिसरात खाजगी वाटर फिल्टर प्लांट बिनदिक्कतपणे चालविले जात होते.

हेही वाचा - नांदेड : मोबाईल शाॅपी फोडून, आपली मोबाईल शाॅपी चालविणारी टोळी जेरबंद, लाखोंचा ऐवज जप्त, भाग्यनगर पोलिसांची कारवाई -

माहूर शहरात पाण्याचे स्त्रोत नसल्याने वाई बाजार व परिसरातील वाटर फिल्टर प्लांटचे पाणी माहूर शहरात विक्री केले जात होते. त्या अनुषंगाने माहूर शहरातील वाटर प्लांट ला सील ठोकण्यात आले. व वाई बाजार येथील वाटर फिल्टर प्लांट मालकांना नोटीस पाठवून सक्षम प्राधिकरणाचे परवानगी तात्काळ प्राप्त करून घ्यावी अन्यथा नगरपंचायत माहूर कडून प्लांट सील करण्यात येईल अशी नोटीस मुख्याधिकारी नगरपंचायत माहूर यांनी पाठविली आहे. हरित लवादाच्या आदेशानुसार नगरपंचायत व पंचायत समिती स्तरावरून वाटर फिल्टर प्लांट मालकांना नोटिसा पाठवणे व सील लावण्याचे कारवाया केले जात असताना मात्र तहसील विभागाने या गंभीर प्रकरणी अद्याप आपली भूमिका स्पष्ट केली नाही.

माहूर तालुक्यातील ग्रामपंचायत क्षेत्रातील वाटर फिल्टर प्लांट मालकांना ग्रामसेवक, ग्राम विकास अधिकारी यांच्या माध्यमातून नोटिसा बजावण्यात आल्या असून आज संध्याकाळी उशिरापर्यंत किंवा उद्यापासून सक्षम प्राधिकरणाची परवानगी नसलेले संपूर्ण वाटर फिल्टर प्लांटला ताळे ठोकण्यात येणार आहे.

- युवराज मेहेत्रे, गट विकास अधिकारी, पंचायत समिती, माहूर.

संपादन - प्रल्हाद कांबळे