हदगाव : तालुक्यात विमा लाभ वितरीत करताना कोणते निकष लावले. मोजक्याच शेतकऱ्यांना जसा लाभ दिला तसा सर्वांना द्या, नाही तर कंपनीविरुद्ध एफआयआर दाखल केला जाईल. असा इशारा ता.३० जानेवारी रोजी कृषिमंत्री धनंजय मुंडे यांनी विमा कंपनीच्या अधिकाऱ्यांना देत त्यांना धारेवर धरले.

हदगाव तालुक्यातील शेतकऱ्यांना युनायटेड इंडिया इन्शुरन्स कंपनीकडून विमा लाभ मिळाला नाही. त्यामुळे या शेतकऱ्यांनी मुंबईत आंदोलन केले. शेतकऱ्यांच्या प्रश्नावर कृषीमंत्री धनंजय मुंडे यांनी मंगळवारी (ता.३०) युनायटेड इंडिया इन्शुरन्स कंपनीच्या अधिकाऱ्यांसोबत बैठक घेतली.

यावेळी हदगाव तालुक्यात ८० हजार शेतकऱ्यांनी विमा उतरविला तर ४० हजार शेतकऱ्यांनी कृषी विभागाकडे तक्रारी दाखल केल्या होत्या. ज्या मोजक्या शेतकऱ्यांना तुम्ही विमा मंजूर केला त्याच निकषानुसार इतरांनाही विमा द्यावा अन्यथा मी कंपनीविरुद्ध एफआयआर दाखल करील अशी ताकीद मुंडे यांनी यावेळी बोलताना दिली.

मुंबईत पार पडलेल्या बैठकीस मंत्री संदिपान भुमरे खासदार हेमंत पाटील बाबुराव कदम कोहळीकर, शेतकरी नेते आत्माराम पाटील वाटेगावकर, कृषी आयुक्त प्रवीण गेडाम, विभागीय कृषी आयुक्त आवटे, जिल्हा कृषी अधिकारी बराटे, गजानन शिंदे धानोरकर, शिवाजीराव जाधव हरडफकर, संदीप पालकर, नागोराव सूर्यवंशी, अविनाश पाटील, रवीकुमार सूर्यवंशी, राजू पाटील या शेतकऱ्यांच्या शिष्टमंडळास मंत्रालय मुंबई येथे पाचारण करण्यात आले होते.