आटपाडी (सांगली) : येथील आंबेबन मळ्यातील शेतकरी सोमनाथ जाधव यांचा सहा महिन्यांच्या सोळा लाख रुपये किमतीचा चोरी गेलेल्या बकऱ्याचा अवघ्या चोवीस तासात पोलिसांनी छडा लावला. कराड येथून बकरा आणि चोरून नेणाऱ्या आटपाडीतील तीन संशयित आरोपींना पोलिसांनी ताब्यात घेतले आहे.  

  आटपाडी कार्तिक महिन्यात दरवर्षी होणारे ग्रामदैवत उत्तरेश्वर देवाची यात्रा यावर्षी रद्द केली होती. मात्र शेतकऱ्यांचे नुकसान टाळण्यासाठी दोन दिवस शेळ्या-मेंढ्यांचा बाजार भरवला होता. या बाजारांमध्ये सांगोला येथील शेतकऱ्याचा दीड कोटी रुपये किमतीचा मोदी बकरा सर्वांचे आकर्षण ठरला होता. या बकऱ्याचे पिल्लू सोमनाथ जाधव यांनी खरेदी केले होते. त्यांनीही  हा सहा महिन्याचा बकरा बाजारामध्ये आणला होता. त्याला पंधरा लाखाची मागणी झाली होती. हे दोन बकरे राज्यभर गाजले होते.       
सोमनाथ जाधव हे येथील आंबेबन मळ्यात कुटुंबीयांसोबत राहतात. दोन दिवसापूर्वी मध्यरात्री त्यांच्या मेंढ्या वाड्यातून अज्ञात चोरट्यांनी वॅगनारगाडी मध्ये बकरा टाकून अज्ञात चोरट्यांनी पळून नेला होता. आटपाडी शहरातील जागोजागी असलेल्या सीसीटीव्ही कॅमेरा मध्ये ही वॅगनार गाडी जाताना चित्रीकरण झाले होते. त्या गाडीचा तपास आणि माहिती घेऊन पोलिसांनी तिघा संशयितांना ताब्यात घेतले होते.

हेही वाचा- भाविकांसाठी खुशखबर ; अंबाबाई, जोतिबा दर्शनाची वेळ वाढवली -

सुरुवातीला या संशयित आरोपींनी हात वर केले होते मात्र पोलिसांनी त्यांचा हिसका दाखवताच गुन्ह्याची कबुली दिली. या तीन संशयित आरोपीनी मध्यरात्री वॅगनार गाडी मध्ये बकरा टाकून कराड येथील डोंगरावर नेहून ठेवला होता. तेथून बकरा पोलिसांनी ताब्यात घेतला. तसेच व्हॅगनार गाडी आणि तीन आरोपींना ताब्यात घेतले आहे. अवघ्या चोवीस तासात चोरी गेलेल्या बकऱ्याचा छडा लावण्यात पोलिसांना यश मिळाल्याने पोलिसांचे अभिनंदन केले जात आहे.  

संपादन- अर्चना बनगे