सोलापूर - आषाढी वारीच्या पार्श्‍वभूमीवर सोलापूर ग्रामीण पोलिसांनी चोख बंदोबस्ताचे नियोजन केले आहे. स्थानिक आणि बाहेरील असे एकूण साडेपाच हजार पोलिस वारकऱ्यांच्या सुरक्षेसाठी असणार आहेत. गर्दीवर नियंत्रण ठेवण्यासाठी नाशिकमधील संस्थेकडून पोलिसांना प्रशिक्षण देण्यात येत आहे.

वारीतील गर्दीवर नियंत्रण ठेवण्यासाठी नाशिक येथील स्वयंसेवकांचे मार्गदर्शन घेण्यात येणार आहे. या स्वयंसेवकांना कुंभमेळ्यातील गर्दी नियंत्रण करण्याचा चांगला अनुभव आहे. ते पोलिसांना प्रशिक्षणही देणार आहेत. तीर्थक्षेत्र पोलिस संकल्पना याअंतर्गत पंढरपुरात मदत केंद्र उभारण्यात येणार आहे. वारीसोबतच पंढरपुरात हरविलेल्या व्यक्तींचा शोध घेण्यासाठी स्वतंत्रपणे पोलिसांचे पथक कार्यरत राहील. महिलांची छेडछाड रोखण्यासाठी निर्भया पथकही असणार आहे. 

एकूण ४०० अधिकारी पोलिस बंदोबस्तासाठी नियुक्त करण्यात येत आहेत. जवळपास साडेपाच हजार पोलिस कर्मचाऱ्यांचा ताफा सुरक्षेसाठी असणार आहे. गृहरक्षक दल आणि राज्य राखीव पोलिस बलाचे जवानही पोलिस बंदोबस्तास असतील.