राहाता ः तालुक्‍यातील केलवड येथील शेतकरी अनिल भाऊसाहेब दाते यांच्या तीन हेक्‍टर छत्तीस गुंठे शेतातून जाणारा रस्ता दोन्ही बाजूंनी सारखा न वाढविता एकाच बाजूला वाढविण्यात आला. त्यामुळे त्यांची अधिक जमीन त्यात गेली. अनधिकाराने हा रस्ता काढण्यात आला.

त्यामुळे मोठे नुकसान झाले. त्यांनी याबाबत पंतप्रधान व मुख्यमंत्री कार्यालयाकडे तक्रार केली. दोन्ही कार्यालयांनी या तक्रारीची दखल घेऊन याबाबत चौकशी करण्याच्या सूचना जिल्हाधिकाऱ्यांना दिल्या.

हेही वाचा - सर्कस नाही, भो ही.. खऱ्याखुऱ्या वाघाशी दोस्ती

दाते यांनी सांगितले, की माझ्या शेतातून जाणारा हा रस्ता बेकायदेशीरपणे मोठा करण्यात आला. त्यामध्ये असलेली चार मोठी झाडेदेखील तोडली. हा रस्ता दोन्ही बाजूंना न वाढविता एकाच बाजूला वाढविला.

याबाबत राहाता पोलिस ठाण्यात व तहसील कार्यालयातदेखील तक्रार केली. मात्र, कारवाई झाली नाही. पंतप्रधान व मुख्यमंत्री कार्यालय, तसेच वन विभागाकडून आपल्या तक्रारीची दखल घेण्यात आली. नियमानुसार कारवाई करण्याच्या सूचना जिल्हाधिकाऱ्यांना देण्यात आल्या आहेत.

आता जिल्हाधिकारी व तहसीलदार यांनी याबाबत योग्य कारवाई करावी. मला न्याय द्यावा, अशी मागणी दाते यांनी केली आहे.