अथणी : तालु्क्यातील बाळीगेरी (Baligeri) येथील जवानाचा बागलकोट (Bagalkot) जिल्ह्यातील लोकापूरजवळ ट्रक-दुचाकी यांच्यातील अपघातात मृत्यू झाला. शुक्रवारी (ता. २६) रात्री ही घटना घडली. शंकर महालिंग पाटील (ShankarPatil)(वय ३२) असे मयत जवानाचे नाव आहे. त्यांच्या पार्थिवावर शासकीय इतमामात बाळीगेरी येथे शनिवारी (ता. २७) दुपारी अंत्यसंस्कार करण्यात आले.

याबाबत अधिक माहिती अशी, जवान शंकर पाटील हा २००८ साली सैन्यात भरती झाला होता. तत्पूर्वी गावातच प्राथमिक व माध्यमिक तर बारावीपर्यंतचे शिक्षण अनंतपूर येथे झाले. त्यानंतर तो सैन्यात भरती झाला. त्यानंतर बारा वर्षे जम्मू-काश्मीरला सेवा बजावली. मद्रासला देखील त्याची बदली झाली. तीन दिवसांपूर्वी तो सुटीवर आला होता. आपली सासूरवाडी बागलकोट जिल्ह्यातील सावशी येथे आपल्या पत्नीला आणण्यासाठी गेला होता. बेळगाव येथे खासगी कार्यक्रमास जावून परत सासूरवाडीस येत होता. शुक्रवारी (ता. २६) रात्री लोकापूरजवळ अपघातात त्याचा मृत्यू झाला. उत्तरीय तपासणीनंतर मृतदेह बाळीगेरीला आणण्यात आला. गावातील प्रमुख मार्गावरून अंत्ययात्रा काढण्यात आली. यावेळी मराठा लाईट इन्फ्रंट्रीच्या जवानांकडून मानवंदना देऊन शासकीय इतमामात अंत्यसंस्कार झाले.

यावेळी केपीसीसी सदस्य चंद्रकांत इमडी, चिक्कोडी जिल्हा भाजपचे मुख्य सचिव निंगाप्पा कोकणे, महसूल निरीक्षक टी. जी. खतट्टी, तलाठी यु. केदनंदमनी यांनी श्रद्धांजली वाहिली. यावेळी सोमलिंग शंकरहट्टी, अशोक कवलगुड, बाबगौंड पाटील, लक्ष्मीबाई लोकूर, कुमार चन्नरेड्डी व परिसरातील नागरिक उपस्थित होते. गावात अनेक ठिकाणी श्रद्धांजलीपर फलक लावले आहेत. तसेच शनिवारी (ता. २७) गावातील व्यवहार बंद ठेवले होते. शंकर पाटील याच्या मागे आई, वडील, पत्नी, दोन मुली, भाऊ, बहीण असा परिवार आहे.

उपस्थितांचे डोळेही पाणावले

आपला मुलगा शंकर याचा मृतदेह गावात येताच आई यल्लव्वा हिने हंबरडा फोडला. मृतदेहाला कवटाळल्यावर तिच्यासह पत्नी सीमा हिच्या अश्रूंचा बांध फुटला. यावेळी उपस्थितांना गहिवरून आले. मयत शंकर पाटील याच्या मागे वर्षा व दीक्षा नावाच्या मुली आहेत. त्यांचेही चेहरे पितृछत्र हरपल्याने दुःखाने केविलवाणे झाले होते. त्यांच्याकडे पाहून उपस्थितांचे डोळेही पाणावले.