बीड - भ्रष्टाचारविरोधी चळवळ राबविणारे ज्येष्ठ समाजसेवक अण्णा हजारे यांचे छायाचित्र पानटपरीत लावून दारू व गुटख्याची सर्रास विक्री करणाऱ्या टपरीचालकास बीड ग्रामीण पोलिसांनी आज दुपारी छापा टाकून पकडले. शहराजवळ धुळे-सोलापूर राष्ट्रीय महामार्गावरील रिलायन्स पेट्रोलपंपासमोरील हॉटेलजवळच ही पानटपरी आहे.

पानटपरीत दर्शनी भागात अण्णा हजारे यांचा फोटो व त्यांच्या भ्रष्टाचारविरोधी जनआंदोलनात उल्लेखनीय कामगिरी केल्याबाबतचे प्रमाणपत्र लावलेले आहे. प्रत्यक्षात टपरीचालक लक्ष्मण मारुती बसवर (रा. बहिरवाडी, ता. बीड) अवैध दारू व गुटख्याची सर्रास विक्री करीत असल्याचे आढळले. ग्रामीण ठाण्याचे सहायक निरीक्षक शीतलकुमार बल्लाळ यांनी आज दुपारी तेथे छापा टाकून त्याला ताब्यात घेतले. त्याच्याकडून अवैध दारू व गुटखा असा दोन हजार रुपयांचा मुद्देमाल जप्त करण्यात आला आहे. त्याच्याविरुद्ध बीड ग्रामीण ठाण्यात गुन्हा नोंद करण्यात आल्याचे बल्लाळ यांनी सांगितले.

जनआंदोलन समितीचे विश्‍वस्त ऍड. अजित देशमुख यांनी याबाबत सांगितले, की टपरीवर सापडलेले प्रमाणपत्र भ्रष्टाचारविरोधी जनजागृती अभियान नावाचे आहे. त्याचा अण्णा हजारे यांच्या जनआंदोलनाशी संबंध नाही.