कोल्हापूर - इचलकरंजीतील जर्मन गॅंगवर संघटीत गुन्हेगारी अंतर्गत कारवाई करण्यात आली आहे. या सहा संशयितांविरोधात पुण्याच्या विशेष मोका न्यायालयात दोषारोपपत्र सादर करण्यात आले. आर्थिक गुन्हे अन्वेषण शाखेचे पोलिस उपअधीक्षक आर. बी. शेडे यांनी चार मे रोजी ही प्रक्रिया पूर्ण केली. 

अविनाश शेखर जर्मनी (वय 25), आकाश आण्णाप्पा भिलुगडे (वय 21), नईम हसन कुकुटनुर (वय 21), बजरंग अरूण फातले ऊर्फ बाचके (वय 22), प्रशांत विनायक काजवे (वय 24) आणि मनोज वामन शिंगारे (वय 23, सर्व रा. इचलकरंजी) अशी संशयितांची नावे आहेत. 

याबाबत उपअधीक्षक शेडे यांनी दिलेली माहिती अशी, जर्मन टोळीवर इचलकरंजीतील शिवाजीनगर पोलिसात प्राणघातक हल्ला, गर्दी मारामारीसारखे गंभीर गुन्हे दाखल आहेत. या टोळीवर संघटित गुन्हेगारी मोका अंतर्गत कारवाई करण्यात आली. या गुन्ह्याच्या तपासात सात जणांवर प्रस्ताव पाठविण्यात आला होता. त्यातील एक जण अल्पवयीन असल्याने तो सोडून अन्य सहा जणांवर कारवाई करण्यात आली. या प्रकरणाचा तपास शेडे यांनी पूर्ण केला. त्यानंतर गुन्ह्याबाबतचे दोषारोपपत्र विशेष मोका न्यायालयात सादर करण्याबाबत राज्य शासन मुंबईतील अपर पोलिस महासंचालक (कायदा व सुव्यवस्था) यांची मंजुरी घेऊन ते पुण्यातील विशेष मोका न्यायालयात सादर केल्याचे शेडे यांनी सांगितले.