ढालगाव : ढोलेवाडी (ता. कवठेमहांकाळ) येथे जिल्हा बॅंकेच्या मतदानासाठी एकाची निवड करावयाच्या सेवा सोसायटीच्या सभेच्या ठिकाणी राडा होऊन सभा तहकूब करण्यात आली. तर दोन दिवसांपूर्वी पळवून नेलेल्या सदस्याला माजी मंत्री अजितराव घोरपडे यांच्या गाडीत पाहून कार्यकर्त्यांनी गाडीची काच फोडण्याचा प्रकार घडला आहे. 

याविषयी घटनास्थळी व पोलिसांतून मिळालेली माहिती अशी, सांगली जिल्हा बॅंकेच्या निवडणुकीची घोषणा लवकरच होणार आहे. यासाठी सेवा सोसायट्यांनी मतदान करण्यासाठी एका सदस्याचे नाव एकमताने निवडायचे आहे. यासाठी ढोलेवाडी गावात नाव निवडण्यासाठी अनेकजण इच्छुक होते. 

सेवा सोसायटीची सत्ता माजी मंत्री अजितराव घोरपडे यांच्या गटाच्या शंकर चोरमुले यांच्याकडे आहे. सोसायटीत एकूण 13 सदस्य असून घोरपडे यांच्या गटाकडे 11 तर खासदार संजयकाका पाटील यांच्या गटाकडे दोन सदस्य होते. मात्र पाच वर्षांत बरीच फाटाफूट होऊन खासदार गटाकडे 6 तर घोरपडे गटाकडे सहा असे बलाबल झाल्याने एक सदस्य आनंदा खरात यांना घोरपडे गटाच्या पोलिस पाटील कृष्णा चोरमुले यांनी पळवून नेले होते. त्याबाबत पोलिस पाटील यांच्यावर पोलिस ठाण्यात गुन्हा दाखल झाला आहे. 

आज मंगळवारी दुपारी सोसायटीच्या कार्यालयात नाव निवडण्यासाठी सभा होती. खासदार गटाचे सहा सदस्य गैरहजर होते. तर घोरपडे गटाचे सहा सदस्य हजर होते. पळवून नेलेल्या सदस्याला अजितराव घोरपडे स्वतःच्या गाडीने घेऊन गावात येताच पळवून नेलेल्या आनंदा खरात यांच्या घरच्यांनी गाडीला घेराओ घालून काच खाली घेण्याची विनंती केली त्या झटापटीत घोरपडे यांच्या गाडीची काच फुटली. पळवून नेलेल्या खरात यांनी घरच्यांनी ताब्यात घेतले व खासदार गटाला पाठिंबा देणार असल्याचे सांगितल्याने गावात चांगलाच तनाव निर्माण झाला होता. तर सभेसाठी खासदार गटाचे सहाही सदस्य उपस्थित राहिले नाहीत. त्यामुळे कोरमअभावी सोसायटीची सभा तहकूब करण्यात आली. 

दरम्यान विलास तातोबा चोरमुले यांनी पोलिसांत राजाराम संभाजी खरात, राजेंद्र तानाजी चोरमुले, बाबासाहेब रंगराव खरात व ब्रह्मानंद शिवाजी खरात यांच्या विरोधात तक्रार दाखल केली असून आदर्श सोसायटीच्या ठरावात आनंदा खरात यांनी भाग घेऊ नये म्हणून चार चाकी कार (एम एच 10: ए-3124) गाडी आडवून सदस्याला पळवून नेले व गाडीची पुढच्या बाजूची काच फोडली असल्याची तक्रार दाखल केली आहे. अधिक तपास पोलिस करत आहेत.