भिगवण - वीस वर्षांमध्ये सत्तेत असताना इंदापुर तालुक्याच्या पाण्याची कधी अडचण होऊ दिली नाही. सध्या इंदापुर तालुक्यातील मदनवाडीपासुन तरंगवाडीपर्यंतचे सर्व तलाव कोरडे आहेत. एका बाजुला दौंड तालुक्यातील सर्व तलाव भरले असताना इंदापुर तालुका मात्र पाण्यासाठी टाहो फोडतो आहे. तालुक्यातील ही दुष्काळीस्थिती निसर्गनिर्मित नाही तर लोकप्रतिनिधीच्या निक्रियतेचा हा दुष्काळ आहे अशी टिका राज्याचे माजी सहकार व ससंदिय कार्यमंत्री हर्षवर्धन पाटील यांनी केली.

डिकसळ (ता.इंदापुर) येथे विकासकामांचे उदघाटन व भुमिपुजन कार्यक्रमामध्ये ते बोलत होते. यावेळी प्रभाग क्र. एक काँक्रीट रस्ता, प्रभाग क्र. दोन दलित वस्ती काँक्रिट रस्ता यांचे भुमिपुजन तर डॉ. बाबासाहेब आंबेडकर सभामंडप व संरक्षक भिंती आदी कामाचे उद्घाटन करण्यात आले. अध्यक्षस्थानी पंचायत समितीचे सभापती करणसिंह घोलप होते पंचायत समिती सदस्य संजय देहाडे, रमेश जाधव, यशवंत वाघ, हनुमंत काजळे, अशोक शिंदे, संपत बंडगर, रंगनाथ देवकाते, शामराव परकाळे,रणजित भोंगळे, संजय रायसोनी,तुषार खराडे, सुनिल काळे, सतीश काळे, सरपंच सुर्यकांत सवाणे, उपसरपंच सायली गायकवाड व ग्रामपंचायत सदस्य उपस्थित होते. 

श्री. पाटील पुढे म्हणाले, भिगवण पंचायत समिती गणांमध्ये समाजकल्याण विभागाकडुन ३८ लाख रुपयांचा निधी आणला आहे. शिरसोडी येथील वीजउपकेंद्र कॉंग्रेसनेच मंजुर केले होते त्याची उद्घाटने मात्र विरोधक करत आहे. 

सभापती करणसिंह घोलप म्हणाले, तुम्ही विकास कामे करता मग आम्ही काय गोट्या खेळतो काय? असा सवाल उपस्थित करत कॉंग्रेसने केलेल्या पंचायत समितीच्या माध्यमातून केलेल्या कामाचेही श्रेय विरोधक लाटत असल्याची टिका त्यांनी केली. पंचायत समितीच्या माध्यमातून वैयक्तिक व तसेच सार्वजनिक लाभाच्या अनेक योजना राबविण्यात येत आहे त्याचा लोकांना लाभ घ्यावा. सुहास गायकवाड गावाच्या विकासाचा आराखडा मांडला. 

प्रास्ताविक शिवदास सुर्यवंशी यांनी केले सुत्रसंचालन देविदास कुंभार यांनी केले आभार नवनाथ सावंत यांनी मानले. कार्यक्रमाचे नियोजन अजिनाथ गायकवाड, लता काळे, लक्ष्मण कुंभार, मारुती शिंदे, पप्पु भोंग आदींनी केले.