तेरवाड बंधाऱ्याजवळ मृत माशांचा खच 
पंचगंगा काठच्या नागरिकांचे आरोग्य धोक्‍यात 

कुरुंदवाड (कोल्हापूर)  ः दूषित पाण्यामुळे पंचगंगा नदीपात्रातील मासे मृत झाले असून तेरवाड (ता. शिरोळ) बंधाऱ्याजवळ मृत माशांचा खच पडला आहे. दूषित पाणी व मृत मासे यामुळे पाण्याला दुर्गंधी सुटली आहे. दूषित पाण्यामुळे पंचगंगा काठच्या नागरिकांचे आरोग्य धोक्‍यात आले असून जिल्हा प्रशासन व प्रदूषण नियंत्रण मंडळाच्या कारभाराविरुद्ध संताप व्यक्त होत आहे. 

पंचगंगा नदीच्या दूषित पाण्याचा सर्वाधिक फटका शिरोळ तालुक्‍यातील सत्तावीस गावांना बसतो. पिण्यासाठी व शेतीसाठी या पाण्याचा वापर केला जातो. उन्हाळ्यात पात्रातील पाण्याचा प्रवाह थंडावल्याने दूषित पाण्याची तीव्रता अधिक जाणवते. गत आठवड्यात नदीला काळेकुट्ट पाणी आले होते. याकडे जिल्हा प्रशासन अथवा प्रदूषण नियंत्रण मंडळाने दुर्लक्ष केले होते. आता पाण्याला उग्र वास येत असून मृत मासे खाण्यासाठी पक्ष्यांचे थवे नदी काठावर घिरक्‍या घालत आहेत. दूषित पाण्यामुळे नागरिकांच्या आरोग्याबरोबर पशुधन, शेती धोक्‍यात आली आहे. 

आदेशाला वाटाण्याच्या अक्षता 

जिल्हाधिकारी दौलत देसाई यांनी गत महिन्यात नदी पात्रातील पाण्याची अवस्था, इचलकरंजी शहरातील सांडपाणी निर्गतीची व्यवस्था पाहणी करून संबंधित विभागाला आदेश दिले होते; परंतु नदी प्रदूषण करणाऱ्या घटकांवर कोणतीही कारवाई होत नसल्याने नागरिकांतून संताप व्यक्त होत असून नागरिक आंदोलनाच्या पवित्र्यात आहेत.