कुर्डू (सोलापूर) : येथे 30 ते 35 वर्षे वय असलेल्या अज्ञात व्यक्तीचा शस्त्राने खून करून मृतदेह जाळून टाकण्यात आल्याचे शुक्रवारी (ता. 17) उघड झाले. लऊळ - शिराळ (मा) रोडवर जोशी वस्तीजवळ ही घटना घडल्याचे समोर आले असून, मृत व्यक्तीची अद्याप ओळख पटली नाही. याबाबत पोलिसांत गुन्हा दाखल झाला आहे.

हेही वाचा - शिक्षण विभागाच्या "या' अधिकाऱ्यांची पत्नी लढणार विधानपरिषद?

खून करून पुरावा नष्ट करण्याचा प्रयत्न
अंकुश रामचंद्र जोशी यांच्या शेतातील खड्ड्यात कडेला 30 ते 35 वर्षीय व्यक्तीचा अर्धवट जळालेल्या अवस्थेतील मृतदेह असल्याची माहिती मारुती निवृत्ती नलवडे यांनी लऊळचे पोलिस पाटील चंद्रकांत लोकरे यांना दिल्यानंतर, घटनेची खबर कुर्डुवाडी पोलिस ठाण्यात देण्यात आली. पोलिसांच्या पथकाने घटनास्थळी धाव घेऊन कसून पाहणी केली. मृतदेहाचा पंचनामा करून शवविच्छेदनासाठी कुर्डुवाडी येथील ग्रामीण रुग्णालयात आणण्यात आला. मृत व्यक्तीच्या डोक्‍यात, पोटात, गळ्यावर व मानेवर शस्त्राने वार करून निर्घृण खून केल्यानंतर मृत व्यक्तीची ओळख पटू नये म्हणून व पुरावा नष्ट करण्याच्या हेतूने शरीर व चेहऱ्यावर इंधन टाकून जाळल्याचे दिसून येते. मृतदेह कुजलेल्या अवस्थेत सापडला असून, याची परिसरात दुर्गंधी सुटल्याचे पोलिसांनी सांगितले.

हेही वाचा - सोलापूर जिल्हा दूध संघाच्या खरेदी दरात दोन रुपयांची वाढ

मृत व्यक्तीच्या खिशात अर्धवट जळालेल्या नोटा
मृत व्यक्तीच्या पॅंटच्या खिशात अंदाजे 25 हजाराच्या 500 रुपयांच्या नोटा अर्धवट जळालेल्या अवस्थेत आढळून आल्या आहेत. मृताच्या डाव्या हाताला करंगळी व अंगठा वगळता तीन बोटे नसल्याचे व मृत व्यक्तीच्या अंगावर अर्धवट जळालेला निळ्या रंगाचा बारीक चौकडा शर्ट असून काळ्या रंगाची पॅंट असल्याचे पोलिसांनी सांगितले. खुनाचा नेमका हेतू लूटमार नसल्याचेही पोलिस सूत्रांकडून सांगण्यात आले. खुनाचे नेमके कारण अद्याप समजू शकलेले नाही. पुढील तपास पोलिस अधीक्षक रवींद्र डोंगरे करीत आहेत.

हेही वाचा - धक्कादायक... एसटीच्या वाढत्या तोट्यामुळे भरती रखडली

गायब व्यक्तींची द्यावी माहिती
अंगावर आढळून आलेल्या जखमांवरून खून झाला असल्याचे स्पष्ट आहे. खून किती दिवसांपूर्वी झाला आहे हे डॉक्‍टरांच्या अहवालावरूनच कळेल. गेल्या चार-पाच दिवसांपासून गायब असलेल्या व्यक्तींची माहिती असल्यास करमाळा उपविभागीय पोलिस कार्यालयाशी संपर्क करावा.
- डॉ. विशाल हिरे, उपविभागीय पोलिस अधीक्षक