कऱ्हाड : राज्यात परिवर्तन होणार हे निश्‍चित आहे. भाजप सरकारचे अपयशच त्यासाठी कारणीभूत ठरेल असा विश्‍वास माजी मुख्यमंत्री पृथ्वीराज चव्हाण यांनी व्यक्त केला. 

कऱ्हाड दक्षिण विधानसभा मतदारसंघातील कॉंग्रेस-राष्ट्रवादी आघाडीचे उमेदवार माजी मुख्यमंत्री आमदार पृथ्वीराज चव्हाण यांनी पालिका शाळा क्रमांक तीनमधील मतदान केंद्रावर मतदानाचा हक्क बजावला. त्यावेळी सौ. सत्त्वशीला चव्हाण उपस्थित होत्या.

मतदानाला जाण्यापूर्वीच प्रवेशद्वारावर लोकसभेचे उमेदवार श्रीनिवास पाटील यांची व आमदार चव्हाण यांची भेट झाली दोघांनीही हस्तांदोलन करत एकमेकांना शुभेच्छा दिल्या. यावेळी सौ. सत्त्वशीला चव्हाण व सौ. रजनीताई पाटील याही उपस्थित होत्या.

आमदार चव्हाण यांनी माध्यमांशी संवाद साधला. ते म्हणाले राज्यात परिवर्तन होणार हे निश्‍चित आहे. सरकारचे अपयशच त्यासाठी कारणीभूत ठरेल. लोकांच्या पोटापाण्याचा प्रश्न बाजूला ठेवून 370 कलम हा प्रचाराचा मुद्दा विरोधकांनी केला आहे. पायाभूत सुविधा, आर्थिक मंदी आधी प्रश्न आ वासून उभी असताना त्याकडे सरकारने केलेले दुर्लक्ष केले हेच राज्यातील परिवर्तनाचे कारण ठरेल. कऱ्हाड दक्षिणेतील जनतेने कोणाला पाडायचे आहे हे ठरवले आहे. त्यामुळे या मतदारसंघात कॉंग्रेसच्या विजयाची परंपरा यापुढेही कायम राहील, असा विश्वास त्यांनी व्यक्त केला. दरम्यान, श्रीनिवास पाटील यांनी जास्ती जास्त मतदारांनी मतदानाचा हक्क बजावावा असे आवाहन केले.