मुरगुड : कोल्हापूर जिल्ह्यातील भडगाव (ता. कागल) येथे पती पत्नीमध्ये झालेल्या किरकोळ वादातून पतीने काठीने व खुरप्याचे वार करून पत्नीचा निर्घृण खून केला. दिपाली रामचंद्र पोवार (वय 40) असे या दूर्देवी महिलेचे नाव आहे. घटनेची नोंद मुरगूड पोलिसात झाली आहे. पती रामचंद्र पोवार याला पोलिसांनी ताब्यात घेतले आहे.

पोलिसांतून मिळालेली माहीती अशी,भडगाव ( ता.कागल ) येथील रामचंद्र दत्तात्रय पोवार याने आपली पत्नी दिपाली रामचंद्र पोवार (वय 40 ) हिला आज पहाटे किरकोळ कारणावरुन झालेल्या वादातून बाबुराव गंगाराम खतकर रा. भडगाव यांच्या सोयाबीन शेतामध्ये नेऊन खुरपे व मेसकाठीने हातावर, पाठीवर, नितंब आणि गुढघ्यावर वार करून तिचा निर्घृण खून केला. पोवार कुटुंबिय हातावरचे पोट असणारे सामान्य कुटुंब आहे. त्यांना दोन मुली व एक मुलगा आहे.त्यापैकी कुमारी माधुरी ही आपल्या आत्याकडे राहते.ती दहावीत शिकते. तर कुमारी सविता व कुमार महादेव हे दोघे नववी व सातवीत एका आश्रम शाळेत शिकत आहेत. रामचंद्र पोवार यास दारूचे व्यसन असल्याचे समजते त्यातूनच त्याने आपल्या पत्नीचा खून केला असावा. असा पोलिसांचा प्राथमिक अंदाज आहे.

भडगावचे पोलिस पाटील उत्तम बाळासो भारमल यांनी घटनेची वर्दी मुरगुड पोलीस ठाण्यात दिली असून घटनेची नोंद पोलिसात झाली आहे. पती रामचंद्र पोवार याला पोलिसांनी ताब्यात घेतले आहे.अधिक तपास सहाय्यक पोलिस निरिक्षक विठ्ठल दराडे करत आहेत.