कडेगाव : कोरोना महामारीच्या कालावधीतील वीज बिले माफ करावी. तसेच वाढीव बिले कमी करावीत त्याचबरोबर शेतीसह शहरात अखंडित वीज पुरवठा करावा. या मागणीसाठी आज सामाजिक कार्यकर्ते डी. एस. देशमुख यांच्यासह सर्व पक्षीय कार्यकर्त्यांनी येथे महावितरणच्या उपकार्यकारी अभियंता यांच्या कार्यालयासमोर वाढीव वीज बिलांची होळी करण्यात आली. 

कोरोना महामारीच्या कालावधीत नागरिक व शेतकऱ्यांचे मोठे नुकसान झाले आहे. लोकांची अर्थव्यवस्था कोलमडून पडली. अतिवृष्टी व अवकाळीमुळे पिकांचे देखील मोठे नुकसान झाले त्यामुळे कोरोनाकाळातील वीज बिल माफ करावीत तसेच वाढीव बिले कमी करावीत. कडेगाव शहरासह शेतीला केला जाणारा वीज पुरवठा वारंवार खंडित होतो. त्यामुळे पाणी असून देखील पिके वाळू लागली आहेत. त्यामुळे सुरळीत वीज पुरवठा करावा. शेतात लोंबकळत असलेल्या विजेच्या तारांमुळे राज्यात अनेक ठिकाणी जीवितहानी झाली आहे. त्यामुळे लोंबकळत असलेल्या विजेच्या तारा सुस्थितीत करणाव्यात. शेती पंपा करिता बंद असलेली नवीन वीज जोडणी पुन्हा सुरू करावी. 

विजेच्या समस्याबाबत हेल्पलाईन नंबर सुविधा सुरू करण्यात यावी. कडेगाव हे तालुक्‍याचे ठिकाण आहे. त्यामुळे ग्राहकांना सुरळीत वीज पुरवठा होण्यासाठी कडेगावला स्वतंत्र उपकेंद्र व अन्य योग्य ती व्यवस्था करावी, अशा मागण्या यावेळी करण्यात आल्या या मागण्यांची योग्य दखल घ्यावी. अन्यथा 22 डिसेंबर रोजी मोर्चा व तीव्र बोंबमारो आंदोलन करण्यात येईल, असा इशारा श्री. देशमुख यांनी यावेळी दिला.

संतोष डांगे, दीपक न्यायनीत, युनूस पटेल, जीवन करकटे, विठ्ठल खाडे, शशिकांत रासकर, राजेंद्र थोरात, प्रकाश शिंदे, खन्ना शेख, युवराज देसाई, युवराज मोरे, अनिल देसाई, अनिल जरग, ज्ञानेश्वर शिंदे, राजेंद्र राऊत, वसंत इनामदार, विठ्ठल खाडे, खाशाबा नायकवडी, दत्तात्रय भोसले, रघुनाथ गायकवाड, मोहन जाधव आदी उपस्थित होते.

संपादन : प्रफुल्ल सुतार