कोल्हापूर :  45 वर्षावरील कोणत्याही व्यक्तीला कोरोना प्रतिबंधक लसीकरण करून घेता येणार आहे. कोरोनाबाधितांची संख्या वाढत असताना भीती वाढत आहेत. या पार्श्‍वभूमीवर सर्वांना लस उपलब्ध व्हावी, यासाठी जिल्ह्यात आणखी 69 लसीकरण केंद्रे स्थापन केली आहेत. तर 60 हजार लस येथे आल्या आहेत.

येणाऱ्या काळात लसीकरण अधिक वेगाने होऊन कोरोना आटोक्‍यात येण्यास मदत होणार आहे. दोन महिन्यापूर्वी कोविशिल्ड लसीकरण मोहीम सुरू झाली. पहिल्या टप्प्यात जिल्ह्यातील कोरोना योद्‌ध्यांना लसीकरण केले. यात डॉक्‍टर्स, आरोग्य कर्मचाऱ्यांचा समावेश होता तर त्यानंतरच्या टप्प्यात सुरक्षा सेवेतील व्यक्तींना लसीकरण झाले. तिसऱ्या टप्प्यात 60 वर्षावरील ज्येष्ठ नागरिक तसेच कोमॉरबीड (व्याधी ग्रस्त) व्यक्तींना लसीकरण सुरू आहे. अनेकजण गैरसमजातून लस घेण्यासाठी चालढकल करीत होते. दीड महिन्यापासून कोरोनाबाधितांची संख्या वाढू लागली. त्यामुळे अनेकजण लसीकरण करून घेण्यासाठी पुढे येत आहेत. 

जिल्हा लसीकरण अधिकारी डॉ. फारूक देसाई यांनी दिलेली माहिती अशी : 
*जिल्ह्यात 150 लसीकरण केंद्र आहेत यात 69 केंद्रांचा समावेश आहे. 
*शासकीय व खासगी रुग्णालयातही लसीकरण केंद्र 
*व्याधीग्रस्त व्यक्तींना व्याधीचा दाखल घेऊन कोविशिल्ड लसीकरण करून घेता येत होते ही अट शासनाकडून रद्द 
* आता 45 वर्षावरील कोणालाही लस घेता येणार आहे 
* कोविशिल्ड लस गरोदर महिला व स्तनदा मातांना घेता येणार नाही 
*ज्या व्यक्तींना ऍलर्जी आहे, ज्यांना रिऍक्‍शन येते त्यांनाही लस घेता येणार नाही 
*18 वर्षाखालील व्यक्तीना लस घेता येणार नाही.