शिंगणापूर : कोल्हापूर शहरातील बहुतांश भागाला पाणीपुरवठा करणारी चंबूखडी येथील पाण्याच्या टाकीची सुरक्षा रामभरोसे झाली आहे. सकाळी आणि सायंकाळच्या वेळी तरुण या टाकीवर फुटबॉलचा खेळ खेळत असतात. 72 वर्षापूर्वी बांधकाम पुर्ण झालेल्या या टाकीची सुरक्षा राखण्याकडे महानगरपालिका प्रशासनाने अधिक लक्ष देण्याची गरज आहे. 

शहरास पाणीपुरवठा करण्यासाठी फुलेवाडी उपनगराच्या पुढे शिंगणापूर रोडवर चंबुखडी येथे उंच टेकडीवर सुमारे 95 लाख लिटर क्षमतेची पाण्याची टाकी बांधली आहे. 19 ऑक्‍टोंबर 1942 ला प्रिन्सेस पद्माराजे छत्रपती यांच्या हस्ते टाकीच्या बांधकामास सुरुवात झाली. 14 एप्रिल 1948 ला टाकीचे बांधकाम पूर्ण झाले व पाणीपुरवठा सुरू झाला. त्यावेळी दोन लाख 35 हजार 625 रुपये बांधकामास खर्च आला. 

पद्माराजे जलाशय चंबुखडी असे टाकीस नाव देण्यात आले. या टाकीतून कोल्हापूर शहरातील निम्म्याहून अधिक भागाला पाणीपुरवठा होत आहे. 95 लाख लिटर क्षमता असलेल्या या चंबुखडी पाण्याच्या टाकीत 24 तास पाणी येत राहते व बाहेर सोडले जाते. सध्या सकाळी व सायंकाळी तरुण मुले या टाकीवर फुटबॉल खेळ खेळत असतात. टाकीला वरती अनेक खुली झाकणे आहेत. टाकीच्या परिसरात चारी बाजूला रात्री जेवणावळी उठत असतात. सर्वत्र दगडांच्या चुली दिसून येतात. जेवणावळी करणारे केरकचरा, दारूच्या बाटल्या तेथेच टाकून जातात. टाकी परिसरात दिवसा एक कर्मचारी व रात्री दोन कर्मचारी कामावर असतात. या कर्मचाऱ्यांना फुटबॉल खेळणारी व जेवणावळी करणारे तरुण दाद देत नाहीत. या तरुणांना हटविण्यास पालिका कर्मचाऱ्यांना मर्यादा पडतात. त्यामुळे पाणी टाकी परिसरात पोलीस कर्मचाऱ्यांची गस्त सुरू होणे आवश्‍यक बनले आहे. 
(पुर्वाध)