कोल्हापूर : प्रदूषणाच्या विळख्यात पंचगंगेचा गुदमरणारा श्वास मोकळा करण्यासाठी ‘पुन्हा साथ देऊया...चला, पंचगंगा वाचवूया’ या मोहिमेंतर्गत उद्या राजर्षी शाहू कृतज्ञता जलदिंडीने पंचगंगा प्रदूषणमुक्तीला प्रारंभ होणार आहे. समाजातील विविध संस्था, संघटनांबरोबरच शासनाची सर्व यंत्रणाही यात सहभागी असेल.
पिरळ (ता. राधानगरी) येथून सकाळी आठला जलदिंडीला प्रारंभ होईल आणि नदीकाठच्या गावांचे स्वागत स्वीकारत, त्या-त्या परिसरात प्रदूषणमुक्तीचा जागर करीत जलदिंडी इचलकरंजीकडे रवाना होईल. दरम्यान, जलदिंडी मार्गावरील गावातील ग्रामस्थांनी आपापल्या परिसरातच उपस्थित राहून जलदिंडीचे स्वागत करावे, असे आवाहन करण्यात आले.
पिरळ येथून पहिली टीम जलदिंडीला प्रारंभ करेल. त्यानंतर दहाच्या सुमारास हळदी (ता. करवीर) येथून दुसरी टीमही जलदिंडीला प्रारंभ करेल. दोन्ही टीम नदीमार्गातील गावांचे स्वागत स्वीकारत सायंकाळी शिंगणापूर येथे येतील. शुक्रवारी सकाळी साडेसातला जलदिंडी शहरातील पंचगंगा घाटावर येईल. येथे स्वच्छता मोहीम, जलदिंडीचे स्वागत व जलसंवर्धनाची प्रतिज्ञा घेतली जाईल. यानिमित्त हजारो कोल्हापूरकर एकवटणार असून, शंभरहून अधिक संस्था, संघटनांसह तालमी व महाविद्यालये मोहिमेत सक्रिय सहभागी होतील. जिल्ह्यातील सर्व लोकप्रतिनिधींचीही उपस्थिती असेल. त्यानंतर राजाराम बंधारामार्गे जलदिंडी इचलकरंजीकडे रवाना होईल.इचलकरंजी येथे सायंकाळी पाचला मुख्य सांगता सोहळा होईल.
‘सकाळ’बरोबर या संस्था
जिल्हाधिकारी कार्यालय, जिल्हा परिषद, जिल्हा पोलिस प्रशासन, शिवाजी विद्यापीठ, कोल्हापूर महापालिका, इचलकरंजी पालिका, प्रदूषण नियंत्रण मंडळ, पाटबंधारे विभाग, महाराष्ट्र राज्य औद्योगिक महामंडळ.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.