कोल्हापूर - येथील युवा गिर्यारोहक कस्तुरी सावेकर हिने नुकताच माउंट एव्हरेस्टवर भारताचा तिरंगा फडकवला. त्यानंतर ती एव्हरेस्टच्या बेसकॅम्पवर पोचली; पण तेथून लुक्ला (नेपाळ) येथे येण्यासाठी हेलिकॉप्टर उपलब्ध न झाल्याने तिने चालतच परतीचा प्रवास सुरू केला आहे. लुक्ला येथे पोचण्यासाठी ७५ किलोमीटरचा प्रवास करत तिला तीन दिवस लागण्याची शक्यता आहे.

अनेक अडचणींवर मात करत कस्तुरीने एव्हरेस्टची मोहीम फत्ते केली; पण तिच्या कुटुंबीयांना आणखी बावीस ते तेवीस लाखांचा निधी जमवावा लागणार आहे. ती कोल्हापुरात परतण्यासाठी आणखी किमान दहा ते पंधरा दिवस लागतील; पण त्यानंतरही सावेकर कुटुंबीयांसमोर आर्थिक ताण कायम राहणार आहे. ज्यांना कस्तुरीसाठी अजूनही मदत करण्याची इच्छा आहे, त्यांनी दीपक सावेकर (९८२२६८१००५) यांच्याशी संपर्क साधावा.

आव्हान आर्थिकच

हेलिकॉप्टरसाठी पन्नास हजार रुपये खर्च आहे आणि तत्काळ इतकी रक्कम उभी करणे अशक्य असल्याने ती चालतच लुक्लाकडे निघाली आहे. अन्नपूर्णा, एव्हरेस्टच्या यशानंतर ती जवळच असलेल्या जगातील चौथ्या क्रमांकाचे लोत्से शिखर सर करणार होती; पण एकूणच आर्थिक स्थिती पहाता तिने ही मोहीम रद्द केली आहे.