इचलकरंजी : राज्यातील ३३७ नगर पालिका, नगर पंचायतीच्या कर्मचा-यांच्या हातात दिवाळीपूर्वी सप्टेंबर आणि ऑक्टोबर अशा दोन महिन्याचे एकत्रीत वेतन पडणार आहे. राज्य शासनाच्या नगर परिषद प्रशासन संचालनालयाच्यावतीने आज या दोन महिन्यांचे एकत्रीत सहाय्यक अनुदान वितरीत करण्यास मंजुरी दिली आहे. त्यानुसार तब्बल ३२९ कोटी ६३ लाख इतका एकूण निधी वितरीत होणार आहे.

दरम्यान, इचलकरंजी पालिकेला १२ कोटी २२ लाख इतके सहाय्यक अनुदान मिळणार आहे. हा सर्व निधी कर्मचा-यांच्या वेतनावर खर्ची पडणार आहे. तथापी, सप्टेंबर महिन्याचे वेतन अद्याप न झाल्यामुळे पालिका कर्मचा-यांमध्ये अस्वस्थता होती. पण आता सप्टेंबरसोबत ऑक्टोबरचे वेतन होणार असल्याने त्यांची दिवाळी गोड होणार आहे.

राज्यातील नगरपालिका व नगर पंचायतींना वेतनापोटी राज्य शासनाकडून दरमहा सहाय्यक अनुदान दिले जाते. पण सप्टेंबरचे सहाय्यक अनुदान प्रलंबीत पडले होते. त्यामुळे हे प्रलंबीत अनुदान कधी मिळणार याकडे सर्वच पालिकांसह नगर पंचायतींचे लक्ष लागले होते. आज नगर परिषद प्रशासन संचालक किरण कुलकर्णी यांच्या स्वाक्षरीने राज्यातील सर्व नगर पालिका व नगर पंचायती यांना एकदम दोन महिन्याचे सहाय्यक अनुदान वितरीत करण्यास मंजुरी देण्यात आली. त्यामुळे राज्यातील पालिका कर्मचा-यांना दिवाळीपूर्वी दोन महिन्याचे एकत्रीत वेतन मिळण्याचा मार्ग मोकळा झाला आहे.

दरम्यान, इचलकरंजी पालिकेसाठी तब्बल १२ कोटी २२ इतके सहाय्यक अनुदान मिळणार आहे. मात्र जिल्हाधिकारी यांच्या आदेशानुसार वेतन राखीव निधीचे प्रत्येकी १ कोटी ४० लाखाचे दोन हप्ते भरावे लागणार आहेत. सेवानिवृत्त कर्मचा-यांची देणी देण्यासाठी हा निधी वापरण्यात आला होता. यामुळे सर्व कार्यरत कर्मचा-यांचे पूर्ण वेतन करतांना प्रशासनाला कसरत करावी लागणार आहे.

जिल्ह्यातील पालिका व मंजूर सहाय्यक अनुदान असे ( सप्टेंबर व ऑक्टोबर)

• इचलकरंजी - १२ कोटी २२ लाख

• गडहिंग्लज - १ कोटी ६ लाख

• हुपरी - २६ लाख ५८ हजार

• जयसिंगपूर - १ कोटी २१ लाख

• कागल - १ कोटी २० लाख

• कुरूंदवाड - ५६ लाख २४ हजार

• मलकापूर - ३८ लाख ६० हजार

• मुरगूड - ५७ लाख ७० हजार

• पन्हाळा - २५ लाख ६३ हजार

• शिरोळ - ९ लाख ४३ हजार

• पेठवडगाव - ८९ लाख ७७ हजार

• आजरा - २ लाख २ हजार

• चंदगड - २ लाख २१ हजार