जयसिंगपूर: जयसिंगपूर, उदगांव, चिंचवाड येथे डेंगी-चिकनगुनियाने थैमान घातले आहे. डेंगीचे दहा, तर चिकनगुनीयाचे पन्नासहून अधिक रुग्ण सापडले. महिनाभरात उदगांव येथे चिकुनगुनियाचे शंभरहून अधिक तर डेंगीचे सात रुग्ण आढळले आहेत. चिंचवाड येथे पाचहून अधिक जणांना चिकुनगुणियाची लागण झाली आहे. जयसिंगपूर प्राथमिक आरोग्य केंद्राच्या पथकाकडून घरोघरी सर्व्हे करण्यात येत आहे. उदगांव येथे शंभरहून अधिक घरात डेंगीच्या अळया सापडल्या आहेत. 

उदगांव येथील महावीर कॉलनीसह गावभागात गेल्या महिन्यात चिकनगुनियाचे पन्नासहून अधिक रुग्ण सापडले होते. या आठवडयात पुन्हा चिकनगुनियाने डोके वर काढले असून उदगांव येथे शंभराहून अधिक जणांना चिकनगुनियाची लागण झाली आहे. आठ दिवसात उदगांव येथील संत रोहीदासनगर, साखळे मळा व गावभाग येथे सात जणांना डेंगीची लागण झाली आहे. चिंचवाड येथे पाच जणांना चिकनगुनियाची लागण झाली आहे. त्यामुळे उदगांव परीसरात भितीचे वातावरण आहे. 

डेंगी व चिकनगुनियाची लागण झाल्याची माहिती आरोग्य विभागास दिली जात नसल्याने आरोग्य विभागाची अडचण झाली आहे. उदगांव परीसरात घरोघरी सर्व्हे करण्यात येत आहे. उदगांव येथे अ व ब आरोग्य उपकेंद्रातर्फे बारा अशासेविका यांच्यासह आरोग्य सेवक व्ही. एस. पाटील, के. सी. चौगुले, ए. एस. वास्के, केतकी गवळी व जी. बी. कुन्नुरे यांच्या पथकाकडून तपासणी करण्यात येत आहे. 

आरोग्य विभागाकडून उदगावात सर्व्हे 
आरोग्य विभागाकडून उदगांव परीसरात सर्व्हे करण्यात येत आहे. यामध्ये एका लोकप्रतिनिधीच्या घरातील फ्रीज व पाण्याच्या टाकीत अळया सापडल्या. त्याचबरोबर गावातील विविध घरात सुमारे शंभराहून अधिक घरात फ्रीज व पाण्याच्या टाक्‍यामध्ये आळया सापडल्या आहेत. 

संपादन - सचिन चराटी

kolhapur