इचलकरंजीत पैसे देवाण-घेवाणवरून मारहाण
इचलकरंजी : येथील गांधी पुतळा चौकात तिघांनी एकाला पैसे देवाण-घेवाणच्या कारणावरून मारहाण केली. या मारहाणीत संजय बाबू बागेवाडी (वय ५२, रा. इचलकरंजी) जखमी झाले. या प्रकरणी विवेक शिंदे (रा. इचलकरंजी), सुधीर हिंगमिरे (रा. तारदाळ) यांच्यासह एक अनोळखी अशा तिघांवर गावभाग पोलिस ठाण्यात गुन्हा दाखल झाला. गांधी पुतळा चौकातील एका मेडिकलसमोर संजय बागेवाडी यांना पैशांच्या देवाण-घेवाणवरून शिवीगाळ करण्यात आली. त्यानंतर लोखंडी सळईने शिंदे याने त्यांना मारहाण केली, तर हिंगमिरे याने लाकडी काठीने मारहाण केली. तसेच, त्यांच्या एका साथीदाराने खाली पाडून बागेवाडी यांना लाथा-बुक्क्यांनी मारहाण करून जखमी केले. बागेवाडी यांच्या फिर्यादीनुसार तिघांवर पोलिसांनी गुन्हा दाखल केला आहे.
--
हातकणंगलेत मुलाला दुचाकीस्वाराची धडक
इचलकरंजी : चंदूर (ता. हातकणंगले) येथे खेळणाऱ्या सातवर्षीय मुलाला एक दुचाकीस्वार जोराची धडक देऊन पसार झाला. अपघातात अहिल हायुल शेख (वय ७) हा जखमी झाला आहे. या प्रकरणी दुचाकी चालकावर शिवाजीनगर पोलिस ठाण्यात गुन्हा दाखल झाला. चंदूर येथे शाहूनगर गल्ली क्रमांक आठ येथे अहिल खेळत होता. या वेळी चंदूर रोडकडून येणाऱ्या दुचाकीस्वाराने अहिलला जोराची धडक दिली. या अपघातात अहिलच्या डाव्या पायाच्या गुडघ्याला गंभीर इजा झाली. अपघातानंतर दुचाकीस्वार पसार झाला. या प्रकरणी हायुल फकीर शेख (वय ३०) यांच्या फिर्यादीनुसार पोलिसांनी गुन्हा दाखल केला आहे.