तेगीनहाळच्या उपसरपंचांवर
शेती वादातून विळ्याने हल्ला

सकाळ वृत्तसेवा
गडहिंग्लज, ता. १८ : तेगीनहाळ (ता. गडहिंग्लज) येथे शेतीच्या वादातून विळा व दगडाने झालेल्या हल्ल्यात उपसरपंच मनोज जाधव व त्यांची आई रत्नाबाई जाधव हे गंभीर जखमी झाले. याप्रकरणी मनोजचे चुलते आप्पाजी जाधव व मारुती जाधव या दोघांविरुद्ध पोलिसात जीवे ठार मारण्याचा प्रयत्न केल्याचा गुन्हा दाखल झाला आहे.
पोलिसांनी सांगितले की, मनोज व त्यांच्या चुलत्यांमध्ये शेतीचा वाद आहे. मंगळवारी (ता. १७) सकाळी साडेअकराच्या सुमारास मनोज हे आपल्या घराच्या दारात उभे होते. त्यावेळी आप्पाजी व मारुती जाधव हे दोघेही विळा घेऊन आले. मनोजला उद्देशून ‘तू उपसरपंच झाल्यापासून लई माजल्यासारखा वागत आहेस, तू गाव सोडून जा, नाहीतर शिमग्यापर्यंत तुला व आईला ठार मारतो’, असे म्हणून दोघांनीही विळा व दगडाने मनोज व आई रत्नाबाई यांच्या डोकीत व हातावर हल्ला करून गंभीर जखमी केले. त्यांच्यावर दवाखान्यात उपचार सुरू आहेत. जखमी मनोज यांनी पोलिसात फिर्याद दिली. पोलिस उपनिरीक्षक शीतल सिसाळ अधिक तपास करत आहेत.