मटकाप्रकरणी वैभव पाटीलसह
अन्य एकावर गुन्हा दाखल

सुधाकर जोशी नगर परिसरात कारवाई ः १ हजार ८६० रुपयांचा मुद्देमाल जप्त

सकाळ वृत्तसेवा
कोल्हापूर, ता. २० ः संभाजीनगर येथील सुधाकर जोशीनगर झोपडपट्टी परिसरातील बोळात कल्याण मटका घेणाऱ्यांवर जुना राजवाडा पोलिसांनी कारवाई केली. यामध्ये दोघांवर गुन्हा दाखल केला आहे. यात एकेकाळी मटका जुगारातील म्होरक्या असलेल्या विजय पाटील याचा मुलगा वैभव विजय पाटील (रा. देवकर पाणंद) आणि प्रथमेश कलकुटगी (वय १९, रा. सुधाकर जोशी नगर) यांच्यावर गुन्हा दाखल केल्याची माहिती जुना राजवाडा पोलिसांनी दिली.
पोलिसांनी सांगितले की, आज दुपारी साडेबाराच्या सुमारास सुधाकर जोशी नगर येथील चिकन सेंटरच्या बोळात कल्याण मटक्यासाठी चिठ्ठ्या गोळा करीत असल्याची माहिती पोलिसांना मिळाली. त्यानुसार पोलिसांनी छापा टाकला असता तेथे प्रथमेश कलकुटगी हा स्वतःसाठी आणि वैभव विजय पाटील याच्यासाठी मटक्याची बुकी चालवत होता. त्यांच्याकडून १ हजार ८६० रुपयांची रोकड, मटका चिठ्ठ्यांचे स्लीप बुक, बॉलपेन असा सुमारे १ हजार ८६० रुपयांचा मुद्देमाल जप्त केला. याबाबतची फिर्याद पोलिस कॉन्स्टेबल योगेश गोसावी यांनी दिली असून अधिक तपास हेड कॉन्स्टेबल प्रशांत घोलप करीत आहेत.