84561
कोल्हापूर : व्‍हिनस कॉर्नर येथील लक्ष्मीनारायण मंदिरात बुधवारी श्री महागणपती आणि गोपूरपंचकलशाची प्रतिष्ठापना झाली.

श्री लक्ष्मीनारायण मंदिरात
महागणपती, पंचकलश प्रतिष्ठापना
भाविकांच्या उपस्थितीत भव्य नगरप्रदक्षिणा सोहळा
सकाळ वृत्तसेवा
कोल्हापूर, ता. २२ : व्‍हिनस कॉर्नर येथील श्री लक्ष्मीनारायण मंदिरात आज महागणपती मूर्ती आणि गोपूरपंचकलशाची विधिवत प्राणप्रतिष्ठा झाली. तत्पूर्वी भाविकांच्या अपूर्व उत्साहात लक्ष्मीपुरी परिसरातून भव्य नगरप्रदक्षिणा झाली. दरम्यान, दिवसभर मंदिरात दर्शनासाठी भाविकांनी गर्दी केली. प्रतिष्ठापना विधीनंतर झालेल्या महाप्रसादाचा लाभही भाविकांनी मोठ्या संख्येने घेतला.
महागणपती आणि गोपूरपंचकलश प्राणप्रतिष्ठापनेनिमित्त कालपासूनच मंदिरात विविध धार्मिक विधींना प्रारंभ झाला. मूर्तीस जलाधिवास, धान्याधिवास, पुष्‍प, फल, वस्त्र अधिवास आदी विधी झाल्यानंतर रात्री भजनाचा कार्यक्रम रंगला. आज सकाळी साडेनऊला लक्ष्मीपुरी परिसरातून भव्य नगरप्रदक्षिणा झाली. त्यानंतर साडेअकरा ते साडेबारा या वेळेत प्राणप्रतिष्ठापना झाली आणि त्यानंतर महाप्रसादाचे वितरण झाले. रुईकर कॉलनीतील चित्रकार विक्रमसिंह पाटील यांनी महागणपतीची मूर्ती ट्रस्टला सुपूर्द केली आहे. पाटील परिवारातर्फे दिनकरराव पाटील, विक्रमसिंह पाटील, नारायणी पाटील आदी उपस्थित होते. गोपूर पंचकलशाचे मुख्य यजमान हरिष जैन होते.
दरम्यान, श्री लक्ष्मीनारायण ट्रस्टचे अध्यक्ष अरुण गोयनका, सचिव दिलीप बजाज, सुभाष मालू, पुरुषोत्तम झंवर, अशोक अग्रवाल, प्रदीप तेडिया, परेश अग्रवाल आदींनी नेटके संयोजन केले. पुरुष भाविकांसाठी कुर्ता-पायजमा आणि महिलांसाठी लाल रंगाची साडी असा पेहराव असल्याने या सोहळ्याची उंची आणखीनच वाढली.