आजरा कारखान्याची
प्रारुप मतदार यादी जाहीर

११ मे पर्यंत हरकती ः २२ मे पर्यंत निर्णय

आजरा, ता. २ ः आजरा शेतकरी सहकारी साखर कारखान्याची प्रारुप (कच्ची) मतदार यादी प्रसिध्द झाली आहे. या यादीवर (ता.११) मे पर्यंत हरकती व आक्षेप स्वीकारण्यात येणार आहेत. २२ मे पर्यंत हरकतीवर निर्णय घेतला जाणार आहे. त्यामुळे जून महिन्यात कारखान्याची निवडणूक होण्याची शक्यता आहे. त्यामुळे राजकीय हालचालींना सुरवात झाली आहे.
आजरा साखर कारखान्याच्या विद्यमान संचालक मंडळाची मुदत मे २०२१ मध्ये संपली आहे. कोरोना व अन्य कारणांमुळे कारखान्याची निवडणूक लांबणीवर पडली. त्यामुळे ३० जूनपुर्वी मुदत संपलेल्या कारखान्याची निवडणूक घेण्यात यावी, त्या दृष्टीने प्रशासकीय पातळीवर तयारी करण्यात यावी, असे प्रादेशिक सहसंचालक साखर यांनी याबाबतचे आदेश दिले आहेत. त्यामुळे आजरा साखर कारखान्याच्या `ब` वर्ग संस्था सभासद प्रतिनिधींची ठराव दाखल करण्याची प्रक्रिया महीनाभरात पूर्ण झाली असून एकूण १६५ संस्था सभासदांपैकी १२० संस्थांनी आपले ठराव दाखल केले आहेत. कारखान्याकडे अ वर्ग उत्पादक सभासद २५ हजार १८१ आहेत. ७ हजार ४३८ ब वर्ग अनुत्पादक व्यक्ती सभासद आहेत. कारखान्याकडे सभासद असलेल्या ४५ संस्थांचे मुदतीत ठराव प्राप्त झालेले नाहीत. २० एप्रिलला संस्था ठराव प्रक्रिया पूर्ण झाली. प्रारुप मतदार यादी आज प्रसिध्द झाली असून या यादीवर ११ मे पर्यंत हरकती दाखल करता येणार आहेत. २२ मे पर्यंत निर्णय दिला जाणार आहे. मतदार यादी आजरा तहसलीदार कार्यालय, सहाय्यक निबंधक कार्यालय आजरा, जिल्हाधिकारी कार्यालय, जिल्हा निवडणूक अधिकारी तथा प्रादेशिक सह संचालक कार्यालय कोल्हापूर व आजरा साखर कारखान्यावरील नोटीस बोर्ड लावण्यात आली आहे.
...

* पंधरा दिवसात पक्की मतदार यादी

हरकतीची अंतिम तारीख ११ मे पर्यंत आहे. या कालावधीत हरकती आल्या नाहीत तर पंधरा दिवसात अंतिम यादी प्रसिध्द होणार आहे. हरकतींवर २२ मे पर्यंत निर्णय़ घेतला जाणार आहे.