आपली आवड व कौशल्य
ओळखून करिअर निवडावे

डॉ. नरके; दहावीनंतरच्या संधींवर कार्यशाळा

कोल्हापूर, ता. ७ : विद्यार्थ्यांनी आवड, क्षमता आणि कौशल्ये ओळखून करिअरची दिशा निवडावी, असे मत प्राचार्य डॉ. महादेव नरके यांनी व्यक्त केले. डॉ. डी. वाय. पाटील पॉलिटेक्निकतर्फे आयोजित ‘१० वीनंतरच्या करिअरच्या संधी व डिप्लोमा इंजिनिअरिंग प्रवेशप्रक्रिया’ या विषयावर कार्यशाळेत ते बोलत होते.
डॉ. नरके म्हणाले, ‘दहावीनंतर कोणती शाखा निवडावी, करिअरची दिशा काय असावी, भवितव्य नेमकं कशात आहे? असे अनेक प्रश्न विद्यार्थी आणि पालकांना पडलेले असतात. सध्या करिअरच्या खूप मोठ्या संधी अनेक क्षेत्रांत निर्माण झाल्या आहेत. रोज नवनवीन तंत्रज्ञान येत आहे. पालकांनी आपली आवड विद्यार्थ्यांवर लादू नये.’
ट्रेनिंग व प्लेसमेंट ऑफिसर प्रा. नितीन माळी यांनी विद्यार्थी व पालकांना ‘पीपीटी’च्या माध्यमातून दहावीनंतर कोणकोणत्या करिअरच्या संधी आहेत, याची माहिती दिली. डॉ. नरके व प्रा माळी यांनी विद्यार्थ्यांचे विविध प्रश्न, शंका यांचे निरसन केले. उपप्राचार्या मीनाक्षी पाटील, रजिस्ट्रार सचिन जडगे, प्रा. महेश रेणके, प्रा. बी. जी. शिंदे, प्रा. अक्षय करपे, प्रा. पी. के. शिंदे उपस्थित होते.