08255

दंगलप्रकरणी ३६ जणांना अटक
४०० जणांवर गुन्हे दाखल, सुमारे ७ लाखांचे नुकसान

सकाळ वृत्तसेवा
कोल्हापूर, ता. ७ ः औरंगजेबाचा वादग्रस्त स्टेटस ठेवल्याने उसळलेल्या दंगलप्रकरणी आज पोलिसांनी सुमारे ४०० जणांवर गुन्हे दाखल केले. त्यातील ३६ जणांना अटक केली. ३ अल्पवयीन आरोपींना सुधारगृहात पाठवले आहे. या दंगलीत दुकाने, वाहने, हातगाड्या यांचे सुमारे ६ लाख ९० हजार रुपयांचे नुकसान झाले. दंगलीचा तपास सुरू असून, आज राज्याचे कायदा व सुव्यवस्था विभागाचे पोलिस महासंचालक संजय सक्सेना यांनी दंगलस्थळी भेट देऊन पाहणी केली व वरिष्ठ अधिकाऱ्यांची बैठक घेतली.
वादग्रस्त स्टेटसमुळे सलग दोन दिवस कोल्हापूर शहरात दंगल झाली. यामध्ये १३ ठिकाणी दगडफेक करण्यात आली. पोलिसांनी जमावाला पांगवण्यासाठी लाठीचार्ज केला. तसेच अश्रुधुरांचाही वापर केला. दुसऱ्या दिवशी शहरातील सर्व प्रमुख मार्ग, चौक, प्रार्थनास्थळे या ठिकाणी पोलिस बंदोबस्त ठेवला होता. शहरातील इंटरनेटसेवाही बंद होती. पोलिसांनी दंगलीचा तपास युद्ध पातळीवर सुरू केला असून, सीसीटीव्ही फुटेज, प्रत्यक्षदर्शी यांच्या माहितीनुसार दंगलीत सहभागी असणाऱ्यांवर गुन्हे दाखल करण्याचे काम सुरू आहे. दंगलीमध्ये सहभागी तरुण बाहेरून आले होते का? याची चौकशी सुरू असल्याचे पोलिस अधीक्षक महेंद्र पंडित यांनी सांगितले. दरम्यान, आज सुमारे ४०० जणांवर गुन्हे दाखल केले असून, त्यातील ३६ जणांना अटक केली. अटक केलेल्यांची नावे जाहीर करण्यास पोलिसांनी नकार दिला.

चौकट
नुकसानीची नोंद करण्यास सुरुवात
दंगलीमध्ये नुकसान झालेल्यांची पोलिस ठाण्यात नोंद करण्यास सुरुवात केली आहे. आज झालेल्या नोंदीमध्ये ३० रिक्षा, १० कार, १८ दुचाकी, ४० दुकाने, ११ हातगाड्या यांचे सुमारे ६ लाख ९० हजारांचे नुकसान झाले.