लोगो ः सकाळ बातमीचा परिणाम
-
कात्रण ः

दुधाळ जनावर योजनेचा मिळणार लाभ
अत्यल्‍प भूधारक शेतकऱ्यांची दखल ः शासन निर्णयात दुरुस्ती

सकाळ वृत्तसेवा
कोल्‍हापूर, ता. १४ : पशुसंवर्धन विभागाने एप्रिलमध्ये शेतकऱ्याला २ दुधाळ जनावरांचा गट देण्याची योजना जाहीर केली. मात्र, यात अत्यल्‍प भूधारक शेतकऱ्यांचा समावेश न करता धनदांडग्या शेतकऱ्यांचा समावेश केला. यामुळे जिल्‍ह्यातील ५ लाख खातेधारकांना योजनेपासून वंचित रहावे लागणार होते. याबाबत ‘सकाळ’ने ''पाच लाख अत्यल्‍पभूधारक शेतकरी वाऱ्यावर'' असे वृत्त प्रसिद्ध केले होते. याची दखल घेत शासनाने अत्यल्‍प भूधारक व दारिद्र्यरेषेखालील लाभार्थ्यांचा योजनेत समावेश करण्याचा निर्णय घेतला आहे.
राज्यातील शेतकऱ्यांचे जीवनमान उंचावण्यासाठी दुधाळ जनावरांचा गट देण्याची योजना राबवण्याचा निर्णय पशुसंवर्धन विभागाने घेतला. यात अल्‍प भूधारक म्‍हणजे १ ते २ हेक्‍टर जमीन असलेले शेतकरी, बचत गटातील महिला व सुशिक्षित बेरोजगारांना ही योजना देणार असल्याचे जाहीर केले. मात्र, जिल्‍ह्याचा विचार करता सर्वाधिक शेतकरी हे अत्यल्‍पभूधारक आहेत. ही संख्या जवळपास ५ लाख इतकी आहे. यापूर्वी ही योजना राबवताना अत्यल्‍प भूधारक शेतकऱ्यांचा समावेश केला होता. मात्र नवीन योजनेत त्यांना वगळले. याबाबत ‘सकाळ’ने वृत्त प्रसि‍द्ध केले होते.
योजनेच्या निकषात बदल करण्यासाठी जिल्‍हा पशुसंवर्धन विभागाचे तत्‍कालीन पशुसंवर्धन अधिकारी डॉ. विनोद पवार यांनी शासनाकडे पाठपुरावा केला, तर आमदार सतेज पाटील, आमदार विनय कोरे यांनीही ‘सकाळ’मध्ये वृत्त प्रसिद्ध झाल्यानंतर सदरच्या निकषात बदल करण्याची मागणी केली. पशुसंवर्धन मंत्री राधाकृष्‍ण विखे पाटील यांना याबाबतचे पत्र दिले. या सर्व प्रयत्‍नांना यश आले असून, विभागाने शासन निर्णयात बदल केला आहे.