हत्तरकींच्या जयंतीनिमित्त
हलकर्णीत आज कार्यक्रम
सकाळ वृत्तसेवा
गडहिंग्लज, ता. २८ : ‘गोकुळ’चे माजी अध्यक्ष राजकुमार हत्तरकी यांच्या ८२ व्या जयंतीनिमित्त उद्या (ता. २९) कार्यक्रमांचे आयोजन केले आहे. हत्तरगीच्या कारिमठाचे गुरुसिद्धेश्वर स्वामींच्या हस्ते प्रतिमा पूजन होणार आहे. माजी आमदार महादेवराव महाडिक, खासदार धनंजय महाडिक यांची प्रमुख उपस्थिती आहे. सकाळी दहा वाजता हलकर्णी भाग हायस्कूलमध्ये कार्यक्रम होईल.
तत्पूर्वी, सकाळी नऊला हलकर्णी केंद्र मर्यादित मॅरेथॉन स्पर्धा होणार आहे. आठवी ते दहावी वयोगटातील मुले व मुलींच्या गटात स्पर्धा होईल. दोन्ही गटांतील विजेत्यांना अनुक्रमे ११०१, ७०१, ५०१ रुपयांची बक्षिसे आहेत. तसेच सांगली येथील लायन्स आय हॉस्पिटलच्या सहकार्याने नेत्र तपासणी व मोतीबिंदू शस्त्रक्रिया शिबिर होणार आहे. रुग्णांची मोफत तपासणी केली जाणार आहे. आवश्यकता असणाऱ्या रुग्णांवर सांगली येथे मोफत मोतिबिंदू शस्त्रक्रिया केली जाणार आहे.
नेत्रतपासणी शिबिराचे उद्‍घाटन भारतीय जनता माथाडी जनरल कामगार संघाचे अध्यक्ष शिवाजी पाटील यांच्या तर मॅरेथॉन स्पर्धेचे उद्‍घाटन रेखा हत्तरकी यांच्या हस्ते होणार आहे. वीरशैव बँकेचे अध्यक्ष सदानंद हत्तरकी, गंगाधर व्हसकोटी, आय. एस. पाटील यांची प्रमुख उपस्थिती आहे. कार्यक्रमांना उपस्थित राहावे, असे आवाहन केले आहे.