हिरण्यकेशी नदीत पवित्रस्नानासाठी गर्दी
रामतीर्थ यात्रेला सुरुवात; आज मुख्य दिवस

आजरा, ता. २६ : रामतीर्थ या धार्मिकस्थळावर रामतीर्थ यात्रेला सुरुवात झाली आहे. आज महाशिवरात्रीनिमित्त भाविकांनी हिरण्यकेशी नदीत पवित्रस्नान केले. राममंदिर व महादेव मंदिरात धार्मिक विधी झाले. गुरुवार (ता. २६) यात्रेचा मुख्य दिवस आहे.
आजरा, भुदरगड, गडहिंग्लज, चंदगड यांसह सीमावर्ती भागातून शेकडो भाविकांनी आज रामतीर्थवर हजेरी लावली. राममंदिरात पहाटे काकड आरती व धार्मिक विधी झाला. पहाटे मंदिर भाविकांना दर्शनासाठी खुले केले. महादेव मंदिरातही धार्मिक विधी झाला. यात्रेनिमित्त मेवा मिठाई, खेळणी यांसह विविध वस्तुंची दुकाने उभारली आहेत. चिमुकल्यांची गर्दी दुकानाभोवती दिसली. आरोग्य पथक, अग्‍निशमन दल, नगरपंचायतीचे कर्मचारी, स्वयंसेवक यात्रेकरूंच्या मदतीला आहेत. आजरा आगाराने यात्रेकरूंसाठी एसटीच्या तीन गाड्या सोडल्या आहेत. पोलिस बंदोबस्तही तैनात आहे. चारचाकी व दुचाकी गाड्यांसाठी यात्रास्थळापासून सुमारे अर्धा किलोमीटर अंतरावर पार्किंगची व्यवस्था केली आहे.