सांगलीसाठीही वापरावी...

71805

इचलकरंजी ः इटली येथे ‘इटालियन टेक्स्टाईल टेक्नॉलॉजी’ पुरस्कार वितरणप्रसंगी ‘डीकटीई’चे विद्यार्थी.

‘डीकेटीई’च्या विद्यार्थ्यांचा
इटलीत सन्मान
इचलकरंजी, ता २१ ः येथील ‘डीकेटीई’च्या कामाक्षी सुंदरम, भाग्यश्री खाडे, शुभम हुल्ले आणि गौरव मर्दा या विद्यार्थ्यांना त्यांनी केलेल्या इटालियन टेक्नॉलॉजीवरील संशोधनासाठी ‘इटालियन टेक्स्टाईल टेक्नॉलॉजी २०२४‘या अॅवॉर्डने इटली येथे गौरविले आहे. द असोसिएशन ऑफ इटालियन टेक्स्टाईल मशिनरी मॅन्युफॅक्चर्स (अॅसिमेट), इटालियन मिनिस्ट्री फॉर इकॉनॉमिक डेव्हलपमेंट आणि इटालियन ट्रेड एजन्सी यांच्यातर्फे त्यांचा गौरव झाला.
‘डीकेटीई’चे अॅसिमेट, इटली यांच्यासमवेत २० वर्षांपासून विविध उपक्रम कार्यरत आहेत. एकूण १८ विद्यार्थी व ७ प्राध्यापकांना याअंतर्गत परदेशी दौरा व इटालियन इंडस्ट्रीजना भेट देण्याची संधी मिळाली आहे. निवड झालेल्या विद्यार्थ्यांत भारतातील ‘डीकेटीई’मधून चार विद्यार्थ्यांची निवड झाली. त्यामुळे विद्यार्थ्यांना अनेकविध देशांतील संशोधकांसमवेत संवाद साधण्याची व ज्ञानार्जन करण्याची संधी मिळाली. टेक्स्टाईल विभागामध्ये कार्यरत असणारे डॉ. पी. बी. मलकाने व डॉ. ए. जे. ढवळे समन्वयक म्हणून इटलीमध्ये विद्यार्थ्यांसमवेत गेले होते. ‘डीकेटीई’च्या विद्यार्थ्यांना इटालियन ट्रेड एजन्सीच्या चिआरा ट्रोसी यांच्या हस्ते सन्मानित केले.
‘अॅसिमेट’ ही संस्था इटलीमधील वस्त्रोद्योगातील अत्याधुनिक यंत्रसामग्री उत्पादित करणाऱ्या उत्पादकांची शिखर संस्था आहे. ही संस्था इटालियन मिनिस्ट्री फॉर इकॉनॉमिक डेव्हलपमेंट व इटालियन ट्रेड एजन्सी यांच्यातर्फे विद्यार्थ्यांच्या संशोधनवृत्तीला चालना देण्यासाठी जागतिक पातळीवरील विद्यार्थ्यांसाठी संशोधन स्पर्धा आयोजित करते. यासाठी जगातील विविध टेक्स्टाईल कॉलेजमधून अर्ज मागविण्यात येतात. संस्थाध्यक्ष कल्लाप्पाण्णा आवाडे, माजी मंत्री प्रकाश आवाडे, सचिव डॉ. सपना आवाडे, कार्यकारी संचालक रवी आवाडे, संचालिका प्रा. डॉ. एल. एस. आडमुठे, उपसंचालक प्रा. डॉ. यू. जे. पाटील यांनी अभिनंदन केले.