पीडब्ल्यूडी हौसिंग सोसायटीत
नवीन ड्रेनेजलाईनची मागणी
कोल्हापूर, ता. २३ ः पीडब्ल्यूडी हौसिंग सोसायटीची ड्रेनेजलाईन अपुरी पडत असल्याने त्यातील मैलामिश्रित सांडपाणी थेट नाल्यात सोडण्यात येत आहे. त्यातून पंचगंगा नदीचे थेट प्रदूषण होत असून, नवीन ड्रेनेजलाईन टाकण्याची मागणी नागरिकांनी निवेदनाद्वारे केली आहे.
पीडब्ल्यूडी हौसिंग सोसायटीच्या मागील बाजूच्या नाल्यातून महापालिकेने ३० वर्षांपूर्वी ड्रेनेजलाईन टाकली आहे. ती ठिकठिकाणी फुटलेली असून, चेंबर पडलेले आहेत. त्या लाईनला माळी कॉलनी, मंडलिक पार्क, शिरगावकर कॉलनी यांचेही ड्रेनेज जोडलेले आहेत. तेथील वस्ती वाढल्याने ही ड्रेनेजलाईन अपुरी पडत आहे. त्यामुळे ती लाईन फोडून मैलामिश्रित सांडपाणी थेट नाल्यात सोडले आहे. त्यामुळे नागरिकांच्या आरोग्यास धोका निर्माण झाला आहे. हा नाला पंचगंगा नदीत मिळत असल्याने प्रदूषण होत आहे. याबाबतचे निवेदन आयुक्त, सहायक आयुक्त, शहर अभियंत्यांना दिले. सहायक आयुक्त कृष्णा पाटील यांनी पाहणी करून नवीन ड्रेनेजलाईन टाकण्याच्या सूचना दिल्या. माजी नगरसेवक अनिल कदम, डी. पी. पाटील, सीमा पाटील, आर. डी. पाटील, बी. आर. कांबळे, अरुण जामळेकर, राम चोकाककर, पंडित माने, दिलीप भिर्डी, डॉ. शकील मोमीन आदींनी निवेदन दिले.