३७ हजार विद्यार्थ्यांनी दिली शिष्यवृत्ती परीक्षा
पाचवीसाठी १५३, तर आठवीसाठी १०० केंद्रे

कोल्हापूर, ता. १२ : जिल्ह्यातील २४ हजार २२२ विद्यार्थ्यांनी पाचवी, तर १२ हजार ८१७ विद्यार्थ्यांनी आठवीची शिष्यवृत्ती परीक्षा आज दिली. महाराष्ट्र राज्य परीक्षा परिषदेतर्फे विविध परीक्षा केंद्रावर परीक्षेचे आयोजन केले होते.
परीक्षेसाठी विद्यार्थ्यांनी कसून अभ्यास केला होता. परीक्षा सुरू होण्यापूर्वी एक तास अगोदर ते पालकांसमवेत केंद्रांवर आले होते. त्यांच्या ओळखपत्रांची तपासणी करून त्यांना केंद्रांवर प्रवेश देण्यात आला. पाचवीसाठी २४ हजार ४२८, तर आठवीसाठी १३ हजार १ विद्यार्थ्यांची नोंदणी झाली होती. पाचवीसाठी १५३, तर आठवीसाठी १०० केंद्रे होती. परीक्षेसाठी २५३ केंद्र संचालकांची जिल्हा स्तरावरून नियुक्ती केली होती. मराठी, उर्दू, हिंदी, इंग्रजी व कन्नड माध्यमातून परीक्षा झाली.
करवीर तालुक्यातून पाचवीसाठी सर्वाधिक ३३७५ तर आठवीसाठी १६५२ विद्यार्थी परीक्षेस बसले होते. कोल्हापूर महापालिका परिसरातून पाचवीसाठी सर्वाधिक ५५ व आठवीसाठी ४३ विद्यार्थी अनुपस्थित राहिले. परीक्षा सुरळीत पार पडाव्यात यासाठी भरारी पथकांनी विविध केंद्रांना भेटी दिल्या.